AP Photo/Achmad Ibrahim, Pool
Авіяцыйныя ўлады Інданэзіі заяўляюць, што ў адным з аддаленых раёнаў правінцыі Папуа знайшлі абломкі самалёта, зніклага сёння з экранаў радараў. Іх выявілі жыхары адной з вёсак. Яны бачылі момант крушэння самалёта.
Разам з тым, як сказаў журналістам міністр транспарту Інданэзіі, пакуль не вядома, ці застаўся хто жывы.
Паводле папярэдніх дадзеных, самалёт урэзаўся ў горы прыкладна ў 25 км ад горада Аксібіл. Гэты раён з'яўляецца цяжкадаступным, таму выратавальнікам з надыходам цемры і з улікам неспрыяльных умоў надвор'я давялося раней прыпыніць пошукава-выратавальную аперацыю.
Для таго, каб дабрацца непасрэдна да месца крушэння, пошукавым атрадам спатрэбіцца па меншай меры 3—4 гадзіны.
Самалёт ажыццяўляў унутраны рэйс. Сувязь з авіялайнерам была страчана ў раёне інданэзійскай правінцыі Папуа на мяжы з Папуа— Новай Гвінеяй.
На яго борце знаходзіліся 49 пасажыраў, у тым ліку пяцёра дзяцей, і пяць членаў экіпажа.
Паводле дадзеных Aviation Safety Network, авіякампанія Trigana Air за час свайго існавання з 1991 года страціла 10 самалётаў, усяго зарэгістравана 14 авіяздарэнняў. Яна знаходзіцца ў «чорным спісе» авіякампаній, якім забаронена лятаць у Еўрасаюз з меркаванняў бяспекі.
