Цэнтвыбаркам апублікаваў дадзеныя па подпісах, сабраных у падтрымку таго ці іншага патэнцыйнага кандыдата ў прэзідэнты.
Сяргей Калякін і Анатоль Лябедзька не здавалі дакументы ў тэрытарыяльныя камісіі, таму іх у табліцы няма.
Аналізаваць розніцу па рэгіёнах у подпісах Мікалая Улаховіча, Сяргея Гайдукевіча і Віктара Цярэшчанкі няма сэнсу. Эксперты з недаверам ставяцца да ўяўнай падтрымкі гэтых прэтэндэнтаў. Адзначым, што за Улаховіча на Гродзеншчыне не было аформлена ніводнага дакумента.
Цікавасць выклікаюць подпісы Аляксандра Лукашэнкі і Таццяны Караткевіч, бо ў тым ці іншым выглядзе іх пікеты прысутнічалі на вуліцах гарадоў і часам карысталіся попытам.
У Лукашэнкі найменшая падтрымка дэкларуецца ў Мінску — 203 тысячы чалавек.
Найбольшую колькасць прыхільнікаў цяперашняй улады налічылі на Гомельшчыне і Магілёўшчыне — па 285 тысяч чалавек.
А вось у Караткевіч пераважаюць сталічныя подпісы — амаль 55 тысяч чалавек (51% ад агульнай сумы подпісаў за Караткевіч).
На Брэстчыне сабрана 16 тысяч подпісаў, на Магілёўшчыне — 12 тысяч. Найменш подпісаў прыйшло з Гомельшчыны — менш за 5 тысяч.
Напрыканцы — несур'ёзны «рэйтынг» кандыдатаў па Мінску
1. Аляксандр Лукашэнка — 202 759 (45% ад усіх «мінскіх» подпісаў)
2. Віктар Цярэшчанка — 82 025 (18%)
3. Таццяна Караткевіч — 54 812 (12%)
4. Сяргей Гайдукевіч — 53 748 (12%)
5. Мікалай Улаховіч — 52 068 (12%)
6. Жанна Раманоўская — 458 (0,1%)
Агулам у пададзеных у ЦВК дакументах 445 870 мінчукоў-падпісантаў.
