Некалькі дзён таму інтэрнэт-карыстальнік Алег Ладуцька напісаў пост, у якім сцвярджае, што ў адной з суполак БРСМ большасць удзельнікаў – боты.
«Наша Ніва» праверыла гэтую інфармацыю, пагутарыла з адмінам суполкі — і вось што з гэтага выйшла.
Справа ў тым, што БРСМ вырашыў стварыць суполкі розных раёнаў Мінска. Суполка, пра якую ўзгадвалася раней, адказвае за Цэнтральны район Мінска. Яна так і называецца – «БРСМ Центральный район». У яе ўваходзіць 5 914 чалавек.
Пошукам па ўдзельніках лёгка вызначыць месца жыхарства. Для пачатку пазначым толькі краіну – Беларусь.
Атрымалася, што ўдзельнікаў суполкі, якія жывуць у Беларусі, — 664. Цяпер, паколькі суполка адказная за Цэнтральны район Мінска, увядзем у пошук «горад Мінск».
Як бачна па скрыншоце, 393 удзельнікі суполкі жывуць у Мінску.
А адкуль жа астатнія актывісты БРСМ? З Расіі — 2 070 чалавек, ЗША — 55 чалавек, Украіна — 794, Казахстан — 21, нават ёсць 6 чалавек з Азербайджана.
Трэба адзначыць, што актыўнасць у суполцы вельмі малая. У сярэднім пост набірае два лайкі, каментаў увогуле няма, што для амаль шасцітысячнай суполкі замала. Адміністратар суполкі пракаментавала дадзеную сітуацыю:
«Разумееце, мы не адсейваем удзельнікаў па тэрытарыяльнай прыкмеце. У нас мэтавая аўдыторыя — моладзь горада».
Кіраўніцтва суполкі не пагадзілася з тым, што ў іх суполцы ёсць боты, і лічыць, што актыўнасць у суполцы прысутнічае. «Навіны гэтыя чытаюць, і яны даходзяць да сваёй мэтавай аўдыторыі яшчэ і дзякуючы рэпостам у іншыя суполкі».
Адміністратар заявіла, што суполцы ўжо як мінімум 4 гады, і за гэты час у яе ніколі не ўкладаліся грошы для прасоўвання ў сацыяльных сетках.
Застаецца толькі здагадвацца, адкуль столькі прыхільнікаў БРСМ у Расіі, Украіне ды ЗША.
