08.03.2008 / 21:57

Не журыцеся, а весялiцеся, адпачывайце ды не перажывайце 13

Пра што пішуць беларускія блогеркі напярэдадні Сьвята Жанчынаў, 8 Сакавіка?

Miss Belarus. Photo by Julia Darashkevich
Віншуем усіх чытачак nn.by з Днём Жанчынаў. Не журыцеся, весяліцеся!
І ніколі ня ўводзьце санкцый супраць мужчынаў, якімі б мы ні былі!

Фота Юліі Дарашкевіч

Пра што пішуць беларускія блогеркі напярэдадні Сьвята Жанчынаў, 8 Сакавіка?

«Мы стаялі на адным і тым жа прыпынку і назіралі, як усё вакол мяняецца: спачатку вясновы ветрык са знаёмым усім пахам (а чым сапраўды пахне вясна?), потым — пякучае сонейка, якое заўжды глядзіць проста ў вочы, потым пад нагамі зьяўлялася лісьце (і адкуль яно такіх колераў), потым лес (дзе ні адзін з нас так і не пабываў) удалечыні рабіўся белым і нерухомым… усё паўтаралася зноў і зноў, працягвала мяняцца. Побач з намі хадзілі людзі ў чорным і ў белым, якіх мы рэдка разумелі. Ды й яны думалі, што мы дзівакі. Дзівакі, на якіх прыемна падзівіцца:) Мяняецца, мяняецца, мяняецца… А мы стаялі і думалі, што нам ня трэба мяняцца. Мы маглі быць проста назіральнікамі. That was it» — піша ў адным зь першых увогуле сёньняшніх допісаў jutca.

«Сьнег паўсюль і надвор’е сабачае, але паветра ўсё роўна пахне вясной. А ўвогуле… вясна, вясна, усе проста як звар’яцелі. Некалькі дзён на календары зьмянілася — і ўсіх рэзка ў рамантыку пацягнула», — натуе ў сваім Жывым дзёньніку smiling_cloud.

Менш паэтычнай аказалася літаратарка Югася Каляда: «Нарэшце я дачакалася прызнаньня маіх пісьменьніцкіх вартасьцяў. «Патрыятычнае апавяданьне пра лес», якое я напісала брату‑шасьціклясьніку Глебу, узялі на школьную выставу. А раней Даша з Пашам за мае «крытычныя творы» на клясыкаў белліту прыносілі толькі тройкі за зьмест. Майстэрства расьце!»

adelka арганізавала дапамогу для выхаванцаў Кобрынскага дзіцячага дому. Цяпер час падводзіць першыя вынікі: «Было сабрана: роўна 500 даляраў (у рознай форме і валюце ад шматлікіх добрых людзей, дзякуй вам, даражэнькія!»

«Шаноўныя, ці мог бы хто пазычыць на некаторы час раман Кена Кізі «Палёт над гняздом зязюлі» Ў АРЫГІНАЛЕ? Калі раптам ёсьць магчымасьць дзе спампаваць электронную вэрсію — будзе ідэальна», — запытваецца ў сваіх фрэндоў адна з найчытанейшых беларускіх блогерак maryjka_.

v_mariamna нагадвае, што на Сядзібе БНФ (Варвашэні (Машэрава), 8) адкрылася фотавыстава Андрэя Плясанава — мастака, які 10 гадоў здымаў веснавыя падзеі ў Беларусі са свайго вакна.

«Сёньня ў мэтро пабачыла абвестку з запрашэньнем на курсы танцаў. Між іншым ёсьць нават такі пункт, як «гімнастіка славянскіх чаровніц». Хацела б я гэта пабачыць», — іранізуе amberss.

Не засталіся па‑за ўвагай беларускіх блогерак і адкліканьне з Вашынгтону пасла Хвастова. barilotti піша: «Падводзім вынікі. Новых санкцыяў у дачыненьні «Белнафтахіму» не было. 14 лютага было апублікавана тлумачэньне пра дзеяньне ўжо існуючых санкцый у дачыненьні да краінаў, асобаў, структур, ахопленых санкцыямі ЗША (у тым ліку Кубы, Судану і г.д.). У гэтым тлумачэньні гаварылася, між іншым, што амэрыканцам не раяць падтрымліваць бізнэс‑стасункі ня толькі з тымі прадпрыемствамі, дзе хтосьці з асобаў або арганізацый, ахопленых санкцыямі ЗША, мае 50 % і болей уплываў, але нават тымі, дзе такія асобы/арганізацыі маюць меней за 50 % уплываў. Таму што ў будучым яны могуць быць ахопленымі такімі санкцыямі. Потым нехта пачаў рабіць запыты з просьбай патлумачыць, як гэта тычыцца «Белнафтахіму» (думаю, тэарэтычна такія запыты маглі накіраваць нават супрацоўнікі беларускай амбасады ;‑)). У адказ на гэтыя запыты амэрыканскі ўрад апублікаваў дадатковыя тлумачэньні па «Белнафтахіме». І вось менавіта гэтыя дадатковыя тлумачэньні беларускі бок назваў дадатковымі крокамі, скіраванымі супраць «Белнафтахіму».

Бліжэй да абеду значна павялічылася колькасьць допісаў уласна пра заўтрашняе сьвята.

«Мужчыны пачалi накрываць на стол… з вытворчасьцi нас ужо павiншавалi каробачкай цукерачак… Музыку уключылi, жанчын прагналi, а мяне пакiнулi))) ндзя… ну й прафэсiя: i жанчыны, й мужчыны успрымаюць мяне, як сваю… нешта у гэтым ёсьць… усе чакаюць падарункаў, а я дапамагаю рабiць буцiкi й пiць каньяк… Вечар у мяне будзе бухi… Са сьвятам усiх мiлых дам! (вiншую загадзя, бо можа заўтра ня будзе магчымасьцi). Кахайце, весялiцеся, адпачывайце й не перажывайце!)) — зычыць усім m_shkodnica.

m_a_r_y_s_i_a падрыхтавала сьвяточнае апытаньне. Яна запытваецца, а што для вас 8 Сакавіка? І сама прапануе некаторыя адказы: «1. сьвята; 2. мэгаСьвята; 3. дзень Розы і Клары; 4. восьмае чысло трэцяга месяца; 5. х* нейкая; 6. …»

«Паважаныя мужчыны… а вам што, шкада цёплых словаў і ўсьмешак хаця б?.. хаця б раз у год?.. хаця б для блізкіх вам жанчын?.. а то ўсё адмазваецеся, выкручваецеся, падводзіце асновы :)» — піша блогерка irisation.

Добрым гуморам на гэтыя вясновыя дні можна заразіцца на блогу ў _tarka_‑і. Адсюль кожны ахвотны можа спампаваць вясновыя банэры на “Беларускія смайлы”.

NN.BY віншуе ўсіх чытачак, глядачак і слухачак з Днём Жанчынаў. Зь вясною вас!

Хочаш падзяліцца важнай інфармацыяй ананімна і канфідэнцыйна?

Зьміцер Панкавец

0
іван / Адказаць
07.03.2008 / 23:17
колькі дзяўчат, і ўсе пішуць! не прападзём! з 8 сакавіка ўсіх!
0
Кнехт / Адказаць
07.03.2008 / 23:29
Восьмага сакавіка - Дзень хмяльнога мужыка.
0
Таня / Адказаць
08.03.2008 / 00:10
Я не сьвяткую 8 сакавiка. А што сьвяткаваць? Мне не патрэбны шампанскае/вiно/пiва/гарэлка у гэты дзень. Шкада кветак. Тое дурное ахвярапрынашэньне кветак выгодна толькi гандлярам. I iдуць п\'яныя кабеты з гэтымi кветкамi 7 сакавiка! Шаноуныя жанчыны! Ёсьць iншыя падзеi у жыцьцi, вартыя адзначэньня! А 8 сакавiка - пустое сьвята.
Паказаць усе каментары/ 13 /
Каб пакінуць каментар, калі ласка, актывуйце JavaScript у наладах свайго браўзеру