У Мінску на офісе «Гавары праўду» прайшла прэс-канферэнцыя Таццяны Караткевіч — кандыдата ў прэзідэнты на выбарах-2015.
«Так!», «Народ патрабуе павагі» і «Мірныя перамены толькі так!» — тры лозунгі Таццяны Караткевіч. Фота з фэйсбука Андрэя Дзмітрыева.
Адкрыў прэс-канферэнцыю кіраўнік выбарчага штаба Таццяны Караткевіч Андрэй Дзмітрыеў. Ён рэзка раскрытыкаваў цяперашні стан спраў у краіне. «Яшчэ пяць гадоў з Лукашэнкам паставяць людзей на мяжу выжывання».
Каманда Караткевіч выступае за мірныя перамены і мае намер дамагчыся іх шляхам удзелу ў выбарах. Дзмітрыеў паабяцаў, што за час перадвыбарнай кампаніі Караткевіч пабывае ў 50 гарадах.
Таццяна Караткевіч у сваім уступным слове выказала ўпэўненасць, што краіне патрэбны новы лідар, новыя людзі. «Хопіць аглядвацца — трэба ісці наперад. І менавіта мы можам быць лакаматывам перамен».
«Мы дорага плацім за адсутнасць рэформ — стагнацыяй і заняпадам, — сказала Караткевіч. — Урад робіць бяздумныя крокі. Апошні з іх — указ 666 аб абмежаванні імпарту. Нават нумар у яго д'ябальскі», — адзначыла яна.
«Хопіць дзяліць грамадства — на беларускамоўных і рускамоўных, праўладных і апазіцыю», — пераканана Караткевіч.
Таццяна Караткевіч прапануе ствараць умовы для развіцця бізнэсу і стварыць антыкрызісны план для адсталых прадпрыемстваў.
Караткевіч лічыць, што ўлада не выконвае сацыяльныя гарантыі. Яна звярнула ўвагу на сітуацыю, калі ў цэлым рэгіёне немагчыма знайсці працу з заробкам, большым за 3 мільёны рублёў. На яе думку, гэта ненармальна.
«Людзі мне скардзяцца, што няма работы, дзеці з’язджаюць, але яны не звязваюць гэта з палітыкай, не звязваюць з бяздзеяннем дэпутатаў, якіх нібыта яны абіралі. Мы ж хочам, каб ніякая ўлада не магла ігнараваць людзей», — кажа Караткевіч.
У якасці сваёй «мэтавай аўдыторыі» Караткевіч бачыць «адукаваных людзей, якія не аглядваюцца назад, якія хочуць добрай будучыні для сваіх дзяцей, гэта людзі, якім надакучыў адзін і той жа твар».
«Нам трэба забяспечыць годны ўзровень адукацыі на ўсіх узроўнях, трэба перавучыць усіх чыноўнікаў — гэта будзе штуршок для развіцця краіны, трэба рэфармаваць усю мадэль кіравання», — мяркуе Караткевіч.
«Мы не збіраемся выганяць чыноўнікоў, мы хочам, каб засталіся прафесіяналы, — кажа Караткевіч, — мы хочам, каб ва ўрадзе працавалі і прафесіяналы з дэмакратычных сіл, каб вярнуліся людзі з замежжа».
Караткевіч сцвярджае, што Беларусь павінна быць мірнай краінай і тут не павінна быць вайсковых баз іншых краін. У выпадку свайго прыходу да ўлады яна абяцае да 2020 года вывесці з Беларусі ўсе расійскія вайсковыя аб'екты.
Караткевіч выказалася і пра заклікі да байкоту выбарчай кампаніі: «Калі мы зробім гэта, то вымушаны будзем сысці з палітыкі праз сваю нямогласць».
Яна паўтарыла сваю думку, выказаную ў часе рэгістрацыі кандыдатаў: улада павінна змяняцца. «Улада — гэта як шкарпэткі. Чым часцей ты іх мяняеш, тым яны чысцейшыя», — сказала Караткевіч.
Карэспандэнт агенцтва «Блумберг» спытаўся ў Таццяны Караткевіч, ці прыме яна пасаду ад Лукашэнкі, калі ён ёй прапануе пасля выбараў. «Яшчэ ніколі не было такога, каб дэмакратычным кандыдатам прапаноўвалі пасады, — адказала Караткевіч. — Але калі так здарыцца, то будзем раіцца», — адказала яна.
