Вярхоўная Рада дала згоду на прыцягненне да крымінальнай адказнасці і арышт народнага дэпутата Ігара Масійчука.
За такое рашэнне прагаласавалі 262 дэпутаты.
Перад гэтым у Радзе выступіў генеральны пракурор Віктар Шокін.
«Генеральнай пракуратурай расследуецца крымінальная справа па факце здзяйснення цяжкіх і асабліва цяжкіх злачынстваў адным з народных дэпутатаў», — сказаў Шокін.
Далей ён прадэманстраваў відэа, на якім народны дэпутат Ігар Масійчук нібыта патрабуе хабару за розныя «паслугі».
Так, на адным з эпізодаў відэа Масійчук абяцае іншай асобе садзейнічанне ў здабычы на кар'еры і называе суму ў памеры 100 000 грыўняў.
«Па кар'еры — для атрымання ліцэнзіі мінімум 100 000 грыўняў трэба ўнесці плюс дзяржплацеж», — кажа на відэа Масійчук.
«Я цябе абараню з міліцыяй, з СБУ. З пракуратурай не абараню цябе пакуль», — кажа на відэа народны дэпутат.
Масійчук належыць да Радыкальнай партыі папуліста Ляшко.
Падчас выступу Шокіна ў Радзе Масійчук і лідар фракцыі Радыкальнай партыі Алег Ляшко сядзелі з сумнымі выразамі твараў.
Пасля дэманстрацыі відэа спікер Рады Гройсман паставіў на галасаванне ўключэнне ў парадак дня пастановы аб арышце і прыцягненні да крымінальнай адказнасці Мосійчука. «За» прагаласавалі 289 народных дэпутатаў. Затым парламентарыі прынялі і саму пастанову пра зняцце недатыкальнасці і арышт.