У Грэцыі адкрыліся выбарчыя ўчасткі на ўсеагульных парламенцкіх выбарах. Дадзеныя папярэдніх апытанняў паказваюць на жорсткую канкурэнцыю паміж левай партыяй «Сірыза», якая знаходзіцца цяпер ва ўладзе, і кансерватыўнай партыяй «Новая дэмакратыя».
Датэрміновыя выбары — ужо пятыя па ліку ў Грэцыі за шэсць гадоў — былі абвешчаныя ў жніўні, пасля таго, як у адстаўку сышоў прэм'ер-міністр Алексіс Цыпрас.
Папулярнасць лідара «Сірызы» рэзка ўпала, калі ён пагадзіўся на здзелку з міжнароднымі крэдыторамі аб новым пакеце фінансавай дапамогі.
Умовы пагаднення ўключалі меры жорсткай эканоміі, супраць якіх першапачаткова выступала «Сірыза».
Грэцыя знаходзіцца ў глыбокім фінансавым крызісе, і пераможцу гэтых выбараў давядзецца праводзіць далейшыя суровыя эканамічныя рэформы.
Па словах карэспандэнта Бі-бі-сі ў Афінах Рычарда Галпіна, партыя, якая пераможа, наўрад ці атрымае дастатковую колькасць месцаў у парламенце для таго, каб сфармаваць урад у адзіночку.
Гэта можа прывесці да перыяду палітычнай нестабільнасці, у той час як крайнія тэрміны рэалізацыі ключавых фінансавых рэформаў робяцца ўсё бліжэйшымі, адзначае ён.