Модульных дамоў шмат — гэта новая хваля ў нерухомасці. Але гэты — не звычайны. Ён малюпасенькі.
Уладальнік такой незвычайнай хаты — Яраслаў. Ён вандраваў па розных краінах, дзе будаваў такога тыпу дамы. Парабіўшы ў Індыі, ён вырашыў вярнуцца на радзіму. Пасля вяртання ён схацеў пабудаваць модульны дом у якой вёсцы. Выбраў Дамашаны — 20 км па лініі электрычкі на паўночны ўсход ад Мінска.
На сёння ў Еўропе і Амерыцы модульныя дамы — гэта альтэрнатыва класічнаму будаўніцтву. Дамы збіраюцца ў мінімальныя тэрміны, яны цалкам экалагічныя і каштуюць танней.
Вось план Яраслававага палаца:
Агульная плошча складае 28 квадратаў. Гэта менш, чым тыповая хрушчоўка. Затое ёсць вялікая тэраса і садок. Ідэальнае лецішча!
Падрабязнае апісанне:
«Брутальны дачны домік, абсталяваны самымі сучаснымі тэхнічнымі сродкамі. Матэрыял сцен — металічны каркас, уцеплены мінеральнымі плітамі. Шклопакеты ПВХ. Энергаэфектыўная сістэма асвятлення. Відэаназіранне і GSM-сігналізацыя. 3 камеры назірання (у тым ліку начнога бачання). Вулічнае асвятленне з датчыкамі руху. Участак 7,63 соткі, прымыкае да лесу. Агароджаны па перыметры капітальным драўляным плотам. Да асфальтавага пакрыцця дарогі 700 м. Станцыя электрычкі за 400 м. Прыпынак маршрутнага таксі і аўтобуса 1 км. Вадаём 2 км. Прамы продаж».
Дызайн — мінімалістычны, з яркімі плямамі.
На сёння за дом просяць 48 000 даляраў, што раўназначна 820 млн рублёў.
У самім доме ёсць усё неабходнае. Падведзена каналізацыя, ёсць кухня з электрычнай плітой, халадзільнік.
Ёсць гарачая вада, душ.
Знутры дом выглядае ўтульна: стаяць некалькі канапаў, моцная камінная печ на дровах.
Ёсць асобнае памяшканне для інвентара з задняга боку хаты.
Ці вытрымае такая хата нашыя зімы?
У якасці асновы на зямлю пакладзена металаканструкцыя. Каркас дома — гэта металічны шкілет са сталёвых труб. А сценавыя панэлі запоўненыя ўцяпляльнікам.
У разрэзе сцяна выглядае наступным чынам: вонкавая дошка, OSB-пліта, уцяпляльнік, параізаляцыя, яшчэ адна OSB-пліта і гіпсакардон. Такім жа чынам уцепленыя падлога і дах.
Плюс гэтага модульнага дома — у магчымасці прыбудоўваць да яго новыя пакоі часткамі, тым самым павялічваючы плошчу дома з найменшымі выдаткамі і па меры сілаў. Гэтак жа гэты дом можна хутка перавезці або развярнуць у іншы бок.
А якое вашае стаўленне да гэтай задумы і модульных дамоў увогуле? Выказвайцеся ў каментах!
