25.10.2015 / 10:00

Памёр Раман Лубкіўскі — украінскі паэт, дыпламат і папулярызатар Беларусі 3

Лубкіўскага не стала 23 кастрычніка, яму было 74 гады.

Украіна будзе памятаць Рамана Лубкіўскага як паэта, дыпламата, лідара ў коле інтэлектуалаў. Пра гэта напісаў прэзідэнт Украіны Пётр Парашэнка ў Твітары.

Вялікай ёсць і заслуга Рамана Лубкіўскага перад беларускай культурай.

Ён быў адным з самых плённых перакладчыкаў беларускай паэзіі на ўкраінскую мову.

Дзякуючы яго намаганням, па-ўкраінску загучалі вершы Янкі Купалы, Максіма Багдановіча (іх Лубкіўскі ўклаў асобным выданнем), Францішка Багушэвіча, Каруся Каганца, Міхася Чарота, Уладзіміра Дубоўкі, Міхася Машары, Піліпа Пестрака, Ларысы Геніюш, Васіля Зуѐнка, Мар'яна Дуксы, Паўлюка Багрыма, Вінцэнта Дуніна-Марцінкевіча, Янкі Лучыны, Пімена Панчанкі…

Раман Лубкіўскі нарадзіўся 10 жніўня 1941 ў сяле Астравок Цярнопальскай вобласці.

Скончыў філалагічны факультэт Львоўскага Нацыянальнага універсітэта ім. І.Франка. Працаваў намеснікам галоўнага рэдактара літаратурнага часопіса «Жовтень».

Адзін з заснавальнікаў Народнага руху Украіны.

Дэпутат першага склікання Вярхоўнай Рады Украіны. У 1990-х быў паслом Украіны ў Чэхіі і Славакіі.

Раман Лубкіўскі з'яўляецца лаўрэатам Шаўчэнкаўскай прэміі.

Ён пакінуў двух сыноў. Маркіян служыць на высокіх пасадах у Службе бяспекі Украіны, а Даніла працуе у МЗС.

0
Балканскі Башта / Адказаць
25.10.2015 / 12:34
Добра памятаю ягоны пранікнёны выступ на вечарыне прысвечанай 100-годдзю Максіма Багдановіча, пра тое, што украінцы маюць самыя прыгожыя ў свеце песні, а беларусы самую прыгожую ў свеце мову... Вечны адпачынак дай яму, Пане Божа.
0
дядько Богдан / Адказаць
25.10.2015 / 21:10
Не стало ще одного українця, щирого друга Беларусі, який своїм талантом зближував наші народи. Вічна йому пам'ять!
0
Беларусін / Адказаць
26.10.2015 / 16:00
Спачуванні.
Каб пакінуць каментар, калі ласка, актывуйце JavaScript у наладах свайго браўзеру