Учора «Наша Ніва» паведамляла, што адзін з вядучых «Рускага радыё» адмовіўся прачытаць віншавальны тэкст па-беларуску.
Сёння мы звязаліся з дырэктарам «Рускага радыё» Яўгенам Малафеем.
Ён паабяцаў разабрацца ў сітуацыі і праз некалькі гадзін даслаў разгорнуты адказ, напісаны па-беларуску.
Чытайце самі:
«Мною праведзена праверка, якая паказала наступнае:
28.10.2015 года, а 20 гадзіне 05 хвіліне, вядучы музычных праграм «Рускага радыё» Глеб Давыдаў выйшаў у жывы эфір з праграмай «Стол заказаў».
А 20 гадзіне 40 хвіліне ў студыю паступіла СМС паведамленне з тэлефона, нумар якога канчаецца на «0542» наступнага зместу:
«Хачу павИншаваТь, каТярыну, в е днём нараджэння, Ей сення40». (Гэта тэкст у арыгінальным напісанні, уключаючы знакі прыпынку)
А 20 гадзіне 46 хвіліне СМС была прачытаная Давыдавым.
Улічваючы тое, што тэкст паведамлення быў некалькі далёкі ад літаратурнай беларускай мовы, утрымліваў памылкі і «русізмы», паведамленне ў эфір яго ў арыгінальным напісанні па зразумелых прычынах выклікала б яго негатыўнае ўспрыманне радыёслухачамі, Давыдаў пераклаў яго на рускую мову.
Адначасова паведамляю, што дырэкцыя ТАА «Рэдакцыя радыёпраграмы «Рускае радыё» ніколі не практыкавала дыскрымінацыі па моўнай прыкмеце.
Многія замоўцы рэкламных матэрыялаў размяшчаюць свае заказы на беларускай мове і не адчуваюць ніякіх праблем з размяшчэннем.
Дасланыя на беларускай мове СМС гэтак жа выходзяць у эфір на арыгінале мовы напісання.
Больш за тое, усе супрацоўнікі радыёстанцыі, якія працуюць у прамым эфіры, уключаючы карэспандэнтаў, каментатараў і вядучых музычных праграм свабодна валодаюць беларускай мовай.
Разам з тым, мова вяшчання нашай радыёстанцыі сапраўды, выключна руская. Гэта патрабаванне запісана ў Дагаворы на права выкарыстання расійскай радыёпраграмы «Рускае радыё - Еўразія». Яго невыкананне цягне сур'ёзныя штрафныя санкцыі.
Мы не можам паставіць у эфір музычны твор ні на адной мове свету, акрамя рускай.
Я прыношу свае прабачэнні за тое, што здарылася і выказваю гатоўнасць вярнуць затрачаныя на СМС грошы. Пры жаданні заказчыка, гатовы паўторна выдаць у эфір віншаванне, напісанае на беларускай мове ва ўзгоднены час.
З павагай, дырэктар Яўген Малафей»
