Reuters
Расія з 1 студзеня 2016 года ўзмацняе мытную абарону і ўводзіць эканамічныя санкцыі ў дачыненні да Украіны, напісаў у Facebook прэм'ер-міністр РФ Дзмітрый Мядзведзеў.
«З 1 студзеня 2016 года будзе павышаны ўзровень мытна-тарыфнай абароны ў дачыненні да Украіны. Гэта звязана з рашэннем нашых суседзяў увесці ў дзеянне пагадненне аб асацыяцыі з ЕС. Акрамя таго, на Украіну як краіну, якая далучылася да антырасейскіх санкцый, будзе распаўсюджанае дзеянне нашых эканамічных мер у адказ», — напісаў Мядзведзеў.
Укpaіна неаднойчы зaяўлялa, штo адтэрміновак уступлення ў сілу эканамічнай часткі Пагаднення аб асацыяцыі з ЕС не будзе.
«Няхай ніхто не сумняваецца, пагадненне аб ЗВГ запрацуе з 1 студзеня 2016 года», — заяўляў не раз прэм'ер-міністр Украіны Арсеній Яцанюк. Аналагічную пазіцыю агучвалі і ў ЕС.
Расія з канца кастрычніка 2014 года забараніла ўвоз з Украіны ўсёй расліннай прадукцыі — гародніны, садавіны, злакаў. Яшчэ раней Масква ўвяла абмежаванне на ўвоз сокаў, малочнай і сырнай прадукцыі, кандытарскіх вырабаў, рыбных і плодаагароднінных кансерваў і асобных відаў алкаголю з Украіны.
Украіна 21 кастрычніка 2015 года падала першы з серыі будучых пазоваў у Сусветную гандлёвую арганізацыю супраць Расіі, які тычыцца гандлёвых абмежаванняў у дачыненні да вагонаў і стрэлачных пераводаў айчыннай вытворчасці.
Па словах гандлёвага прадстаўніка Наталлі Мікольскай, экспарт Украіны з-за гэтых абмежаванняў па 86 таварных групах скараціўся з 1,7 млрд даляраў у 2013 годзе да 51 млн даляраў за 7 месяцаў 2015 года.
Раней Украіна ўнесла на разгляд Камітэта Сусветнай гандлёвай арганізацыі па тэхнічных бар'ерах у гандлі ўведзеную Расіяй забарону на ўвоз кандытарскіх вырабаў, малочнай і сокавай прадукцыі, уключаючы дзіцячае харчаванне, а таксама піва ўкраінскага паходжання.
