З 28 кастрычніка па 1 лістапада ў Парыжы праходзіў еўрапейскі паўфінал прэстыжнага міжнароднага дзіцячага балетнага конкурсу Youth America Grand Prix 2016, паведамляе прэс-служба беларускага пасольства ў Францыі.
Упершыню ў гэтым творчым спаборніцтве ўзяла ўдзел Беларусь, якая была прадстаўлена сямігадовай Верай Шпакоўскай — выхаванкай мінскай «Балетнай школы Вежнавец». Падчас адборачнага тура майстэрства дзяўчынкі зачаравала арганізатараў конкурсу, і для яе было зроблена выключэнне па ўзросце. Вера — самая юная ўдзельніца конкурсу, яна сапернічала з дзевяці- і дзесяцігадовымі дзяўчынкамі, паведамляе дыпмісія.
Па выніках конкурсу беларуская ўдзельніца ўвайшла ў дзясятку найлепшых з 86 прэтэндэнтак узроставай катэгорыі 8—12 гадоў і была запрошаная ў Берлінскую акадэмію балета.
