І
Памяці герояў космаса
Восток-1
сперматазоід чалавецтва
са жгуцікам даўжынёю сто восем хвілін:
Зямля заўважна акруглілася
Apollo-11
one small step –
аднапавярховая Амерыка
пакінула бутэльку малака на суседзкім ганку
one giant leap –
саранча
у бурштынавым скафандры
* * *
ён і яна
іх супольная фатаграфія,
што была зроблена на стужкавы фотаапарат
яшчэ да з'яўлення тэхналогіі anti-red eye,
падобная на гульню бейсбольных клубаў
Rochester RED Wings ды Pawtucket RED Sox
што пачалася 18 красавіка 1981 года
і доўжылася больш за 8 гадзінаў
гульня была перапыненая з нічыйным лікам
толькі раніцай 19-га
(за гэтую ноч абедзве каманды
зрабілі 882 падачы )
праз два месяцы
сустрэча была даведзена да канца —
Крылы зламаліся адразу
II ♥
NY
НЬЮ-ЁРКСКІЯ БРАТЫ-БЛІЗНЯТЫ:
ПЕРАБЛЫТАНЫЯ Ў ДЗЯЦІНСТВЕ БУЭНДЗІА
Хасэ Аркадзіа ІІ
зранку
намагаецца пралупіць вочы
у ненатуральна ламанай позе — N
у вагоне нью-ёркскага метро
у гадзіну пік
праз рэшткі сну
ён раптам усвядоміць:
усе гэтыя яго спадарожнікі
усе гэтыя тры тысячы целаў
усе яны — мёртвыя штодня
да свайго прыпынку едзе
ужо як цудам жывы
Аўрэліяна II
бясконцымі дажджлівымі вечарамі
гэты нястомны жыццялюбца
расхінае плашч
і дэманструе сваю эрэкцыю — Y
выпадковым мінакам у Central Park:
пладзецеся, каровы, — бо жыццё занадта кароткае!
яго жыццё скончыцца
у адзін дзень з братам
іх смерць з канчатковым пераблытваннем
пакажуць у жывым эфіры
усіх тэлевізійных томікаў
што транслююць
сто гадоў адзіноты
РОБАТ«ПАЦУЧЫНЫ КАРОЛЬ-СОНЦА»
два хлапчукі ў палацавых пакоях
прыдумляюць новую гульню
правілы такія:
кожны запускае па механічным пацуку
і, калі тыя
працяжнікамі-хвастамі
сплятуцца ў пацучынага караля,
то кожны з гульцоў мусіць паспець
першым назваць атрыманага вырадка
дзяржава — гэта я
той, хто прайграў,
смеху дзеля, апране жалезную маску
пераможца —
пакіне завадную цацку сабе
PUKSTJAZZ: ПРАСТАКУТНІКІ І КРУЖОЧКІ
вокладкі альбому, што размаляваныя ўручную
для самаробнага накладу на cd —
яны нібыта купюры,
што былі кінутыя ў фантан на Востраве слёз
у Мінску, сталіцы Беларусі —
краіны,
дзе манеты не чаканяць,
і таму
ў фантан на Востраве слёз кідаюць купюры —
размоклыя
рознакаляровыя насоўкі
рознай вартасці
Карнавальны фантан Жана Тэнглі
Рэшата
рэшэта чэрпае з самых глыбінь:
прапускае праз сябе
глыбіню
Павук
павук настройвае эолаву арфу:
навязлівы матыў чапляе адразу
і ўжо не адпускае ніколі
Мятліца
адбітак неба ў вадзе:
мімалётна праплывае
луска птушак і пер’е рыб
Тэатральная галава
шчырасць і бляск у вачох
прафесійнай плачкі
што выстаўлена на вуліцу
Дрыжыкі
жук, які ляжыць на спіне,
лапкамі перабірае варыянты:
вагацца, хістацца, гойдацца
Блазан Заўзэр
блазан, якому на час даверылі карону,
удзячна вітае ўсіх узнятымі дагары рукамі:
усе дзесяць пальцаў круцяцца ля скроні
Флейтыст
музыка праз трубачку
на адным дыханні:
падсвядома ўсплывае Гамельн
Капач
чорны капач знайшоў кроплю ў моры:
кругі, што пабеглі па паверхні,
таропка закідвае жменямі вады
Пырскалка
з поля бітвы
спяшаешся дадому
заправіць вадзяны пісталецік
Фантан
шматкроп'е курсівам:
прыгожыя радкі ні аб чым —
адна вада
