Банк развіцця ў межах праграмы падтрымкі малых і сярэдніх прадпрыемстваў 16 лістапада адкрыў лінію крэдытавання стартап-праектаў. Пра гэта паведаміла начальнік сектара арганізацыі фінансавання малога і сярэдняга прадпрымальніцтва Банка развіцця Юлія Кавецкая, выступаючы на V Міжнародным форуме прадпрымальніцтва ў Мінску.
«Банк развіцця распрацаваў асобны механізм для зноў створаных прадпрыемстваў, які, як чакаецца, стане імпульсам для развіцця новых высокаэфектыўных і канкурэнтаздольных прадпрыемстваў», — сказала Кавецкая. Паводле яе слоў, прынцыповым адрозненнем новага прадукту з'яўляецца ніжэйшая працэнтная стаўка, чым па астатніх прапановах у межах праграмы: 0,5 стаўкі рэфінансавання плюс 4 працэнтныя пункты.
«Мы лічым, што пакрыццё працэнтнай стаўкай толькі інфляцыйных чаканняў і затрат з'яўляецца справядлівым у адносінах да кампаній-пачаткоўцаў», — сказала спецыяліст.
Прэтэндаваць на крэдыт Банка развіцця могуць стартап-кампаніі, якія ажыццяўляюць сваю дзейнасць менш чым год з моманту рэгістрацыі, а таксама кампаніі, зарэгістраваныя раней, але якія вядуць фінансава-гаспадарчую дзейнасць менш як год.
Начальнік сектара Банка развіцця таксама анансавала магчымае адкрыццё ў наступным годзе крэдытнай праграмы для прадпрымальнікаў у замежнай валюце за кошт сродкаў крэдытнай лініі Сусветнага банка. Прадстаўнік СБ Ёхана Джагер удакладніла, што праграма можа быць адкрытая ў сярэдзіне ліпеня 2016 года.
Паводле слоў Кавецкай, агульны аб'ём фінансавання праграмы падтрымкі малога і сярэдняга прадпрымальніцтва Банкам развіцця ў 2016 годзе плануецца павялічыць да 800 млрд. рублёў.
Праграма падтрымкі МСП, у межах якой Банк развіцця крэдытуе прадпрымальнікаў праз 11 банкаў-партнёраў, стартавала ў жніўні 2014 года. На рэалізацыю 400 інвестпраектаў малога і сярэдняга бізнесу праз яе ўжо выдзелена больш як 2 трлн рублёў.
