З 2016 года плануецца адмяніць падатковую льготу пры рэалізацыі насельніцтву паслуг па газа- і электразабеспячэнні. Гэтую меру прадугледжвае праект бюджэту на наступны год.
З 2016 года прапануецца ўстанаўліваць тарыфы на газ і электраэнергію для насельніцтва з улікам падатку на дададзеную вартасць (ПДВ). Сёння ПДВ складае 20%.
Як растлумачылі БелаПАН спецыялісты, знаёмыя з сітуацыяй, прапанова аб уключэнні ПДВ у тарыфы для насельніцтва з'яўляецца адной з мер, скіраваных на ліквідацыю практыкі перакрыжаванага субсідавання.
Зараз сумы ПДВ газа- і энергазабеспячальныя арганізацыі адносяць на свае затраты, звязаныя з аказаннем насельніцтву паслуг газа- і электразабеспячэння. Чакаецца, што ў выніку ўключэння ПДВ у тарыфы на газ і электраэнергію павялічыцца працэнт кампенсавання насельніцтвам затрат на аказанне такіх паслуг.
Тэма ўключэння ПДВ у тарыфы для насельніцтва на газ і электраэнергію ўжо стала, паводле звестак БелаПАН, прадметам дыскусій на афіцыйным узроўні.
Нагадаем, рэформа тарыфаў з'яўляецца адной з умоў міжнародных фінансавых арганізацый, з якімі Беларусь вядзе перамовы аб прыцягненні новых крэдытаў.
Трэба адзначыць, што тэмпы росту тарыфаў на жыллёва-камунальныя паслугі ў Беларусі вызначаюцца дзяржавай і рэгламентуюцца рашэннямі прэзідэнта. Згодна з указам № 550, прынятым у 2013 годзе, штогод 1 студзеня тарыфы на такія паслугі павышаюцца ў памеры, эквівалентным 5 доларам.
