Аляксандр Лукашэнка 23 лістапада падпісаў указ № 471 «Аб пытаннях фінансавання пад уступку грашовага патрабавання (факторынгу)».
Як паведамляе прэс-служба прэзідэнта, нормы ўказа накіраваныя на рэалізацыю ініцыятыў па развіцці факторынгавых аперацый ва ўзаемным гандлі краін — членаў ЕАЭС, а таксама пры экспарце ў трэція краіны, зняцці бар'ераў па гэтых аперацыях у разліках пры імпарце, у першую чаргу прамежкавай прадукцыі (сыравіны) і паслуг.
Такім чынам, ствараюцца ўмовы для пашырэння магчымасцей выкарыстання факторынгу як эфектыўнага інструмента фінансавання для прадпрыемстваў малога і сярэдняга бізнесу, якія з'яўляюцца пастаўшчыкамі буйных прадпрыемстваў. Даўжнікі і крэдыторы атрымліваюць магчымасць больш гібка кіраваць сваімі фінансавымі патокамі. Апрача таго, як зазначае прэс-служба прэзідэнта, прыняцце ўказа дазваляе завяршаць знешнегандлёвыя аперацыі шляхам выканання банкам абавязацельстваў, што вынікаюць з дагавора факторынгу або факторынгавай аперацыі.
Указ набудзе моц праз шэсць месяцаў пасля яго афіцыйнага апублікавання.
Каментары