 |
З 2 па 11 красавіка ў мастацкай галерэі «Падземка» пройдзе выстава малюнкаў, карцін і паштовак вядомага рок‑музыкі Ігара Варашкевіча і мастачкі, што малюе песьні, Нікі Сандрос.
Ніка нарадзілася ў Грэцыі і зь дзяцінства малявала песьні свайго дзядзькі, вядомага грэцкага сьпевака Яніса Куроса. Пазьней жыла ў Чылі і адтуль дасылала дзядзьку малюнкі чылійскіх песень. Калі мастачка апынулася ў Беларусі, то доўгі час нават і ня думала пра мастацтва, пакуль аднойчы не захапілася музыкай наноў. Зараз сярод яе малюнкаў можна знайсьці ня толькі вядомых Bjork, Tori Amos, Janis Joplin, але і знаёмыя вам гурты Крама і Indiga.
Ніка любіць ня толькі гукі. Зараз яна працуе над сэрыяй мона‑коміксаў «О разбитом мире, выброшенных белых флагах, и шатающемся Ози…», якая апісвае ўзаемаадносіны мастачкі з уласным мужам. Чамусьці яна кліча яго Озі Озбарнам. Відавочна, гэта прага арытмічнай жанчыны да мужчын рок‑н‑ролу.
Дарэчы, вядомы вам мужчына рок‑н‑ролу — Ігар Варашкевіч, лідэр гурта «Крама», кажа, што ніколі ня думаў, што возьмецца за маляваньне, хаця і мае адукацыю мастака. Звычайна Варашкевіч цікавіўся музыкай, а тут выпадкова зьявіўся кампутар, пляншэт і вольны час. У выніку сьвет пабачылі малюнкі‑адлюстраванні канфлікту жыцьцярадаснага чалавека з дэпрэсіўнай рэальнасьцю. Праверце, можа, вы кармічныя сваякі?
