Беларус, які прыехаў у Літву на ровары, хаваў пад адзеннем 200 пачкаў кантрабандных цыгарэт.
Служба аховы дзяржмяжы Літвы паведамляе, што 3 снежня з Беларусі на Эйшышскі КПП прыехаў 40-гадовы веласіпедыст. У гэтага грамадзяніна Беларусі ёсць від на жыхарства ў Літве.
Мужчына дэклараваў, што не вязе нічога забароненага. Дакументы ў мужчыны былі ў парадку, аднак ён выклікаў у памежнікаў падазрэнні.
Ён перасоўваўся неяк нязграбна. Памежнікі даставілі яго ў памяшканне і праверылі.
Высветлілася, што ў яго на грудзях, на жываце і на нагах былі замацаваны цыгарэты, іх маскіравала верхняя вопратка. Усяго на ім аказалася 200 пачкаў цыгарэт NZ Gold Superslims.
За адміністрацыйнае правапарушэнне беларусу пагражае штраф у памеры 1448—2896 еўра.
Пасля допыту беларуса адпусцілі. Цыгарэты ў яго канфіскавалі.
