Арганізатары запрашаюць усіх ахвотных узяць удзел у Беларускай інтэлектуальнай гульні, дзе за кубачкам гарбаты ці келіхам піва можна паспаборнічаць у ведах і інтэлектуальных здольнасцях з іншымі камандамі – аматарамі беларускай культуры.
Гульня складаецца з 9 тураў, у кожным з якіх пяць заданняў, акрамя фінальнага, дзе іх удвая больш. Пытанні прыдуманыя так, каб удзельнічаць у баях розумаў цікава было ўсім, незалежна ад заглыбленасці ў «беларускую тэму».
Акрамя гэтага, удзельнікаў чакаюць паэтычныя і музычныя сюрпрызы.
Працягласць – 2-2,5 гадзіны.
Кошт квітка – 50 000 бел. рублёў за 1 чалавека.
Кароткая інструкцыя ад арганізатараў:
1. Збярыце каманду ад 2 да 10 чалавек, зарэгіструйце яе 16 снежня (рэгістрацыя будзе адкрытая з 12.00 у суполцы vk.com/belaruski_pab_kviz і facebook.com/groups/bel.int.fest).
2. Прыходзьце 21 снежня 2015 а 19-й гадзіне ў клуб «OVERTIME» (Мінск, праспект Пераможцаў 4, Палац спорту)
3. Калі не маеце каманды, усё роўна прыходзьце. Абавязкова знойдзем для вас кампанію!
