Агульнаэўрапейская сытуацыя з ростам эўра, падзеньнем даляра і ўмацаваньнем нацыянальных валют апынулася на руку многім беларусам. Асабліва тым, хто мае дзелавыя й прыватныя стасункі з краінамі Эўропы, у прыватнасьці, з Польшчай.

Рэч у тым, што ўсе грашовыя стасункі ў Беларусі па сёньняшні дзень завязаныя на даляры — купля патрыманых аўто, тэхнікі празь інтэрнэт, аплаты любых паслугаў. Гэта неафіцыйны, але існы й паўсюдны спосаб.

Пры такой сытуацыі цягам апошніх трох месяцаў ад агульнаэўрапейскага росту эўра выйгралі тыя беларусы, якія маюць зьбераганьні ў злотых. Расклад просты. 29 сьнежня 1 злоты можна было здаць у банк за 870 рублёў, то бок набыць за 1000 злотых 403 даляры па тагачасным курсе. 28 сакавіка, 1 злоты можна было прадаць банку за 962 рублі, што раўняецца сёньня 448 далярам. Гэта значыцца, маючы на руках 1000 злотых, чалавек можа зарабіць за 3 месяцы 45 даляраў.

Фэнамэнальна, але нават трымаючы сёньня зьбераганьні ў эўра, столькі не заробіш. Перад Новым годам 1 эўра можна было прадаць за 3140 рублёў, зараз за 3386. Але на суме ў 300 эўра за тыя самыя 3 месяцы можна было зарабіць толькі 34 даляры!

Тым часам падзеньне даляра дае людзям усё большыя страты ў пераліку на беларускія рублі. На мінулым тыдні быў зафіксаваны рэкордна нізкі курс здачы ў банк даляраў —2135 рублёў. У параўнаньні са сьнежаньскім курсам, на 1000 даляраў чалавек страчвае 3,5 даляры.

Арцём Багданаў, Польскае радыё для замежжа