У Лельчыцах на выязным пасяджэнні Гомельскага абласнога суда 17 снежня прайшлі дэбаты па рэзананснай крымінальнай справе. Жыхар Лельчыцкага раёна абвінавачваецца ў забойстве дзвюх і больш асоб агульнанебяспечным спосабам і з асаблівай жорсткасцю.
Як паведаміла прэс-сакратар Гомельскага абласнога суда Наталля Пугачова, дзяржаўнае абвінавачванне запатрабавала для абвінавачванага 23 гады пазбаўлення волі.
Нагадаем, у красавіку 2015 года 36-гадовы жыхар раёна падпаліў фургон аўтамабіля, у якім знаходзіліся людзі. Вяртаючыся з працы ў службовым аўтамабілі па дарозе Тураў — Лельчыцы — Славечна, пасля сумеснага распівання спіртных напояў з калегамі, на глебе раптоўна ўзніклых асабістых непрыязных адносінаў абвінавачваны ўзяў каністру з бензінам і выліў яго на падлогу ў цэнтральнай частцы фургона, падпаліў выліты бензін і выскачыў на хаду з машыны, якая загарэлася. У аўтамабілі знаходзіліся восем чалавек.
Вадзіцель, заўважыўшы ўзгаранне, рэзка знізіў хуткасць і спыніў аўтамабіль, пяці пацярпелым удалося самастойна пакінуць палаючы фургон. Трое мужчын ад нанесеных цялесных пашкоджанняў памерлі ў бальніцы. Агнём знішчаны службовы аўтамабіль і асабістыя рэчы пацярпелых.
Прыгавор павінен быць аб'яўлены 29 снежня.
