Работнікі віцебскага ААТ «Жылбуд» перад надыходам Новага года спрабуюць прадаць па цане ніжэйшай за намінал выдадзеныя ім на прадпрыемстве сертыфікаты для куплі абутку і скургалантарэі «Марка» — некалькі такіх аб'яў з'явілася ў сацсетках.
Рэдакцыя «Народных навін Віцебска» звязалася з уладальнікамі гэтых купонаў. Адна з працаўніц будаўнічай фірмы распавяла, што сертыфікаты на 800 000 рублёў ім выдалі на прадпрыемстве, узяўшы пры гэтым распіскі ў атрыманні і згодзе на тое, што гэтая сума будзе вылічаная з іх заработнай платы цягам трох месяцаў.
Паводле інфармацыі на сертыфікатах, іх можна выкарыстоўваць у фірмовых крамах гандлёвай сеткі «Марка», прычым яны будуць сапраўдныя толькі да 30 студзеня 2016 года. Дзякуючы таму, што сертыфікаты не імянныя, многія спрабуюць іх прадаць, звычайна выстаўляючы цану ў 700 000 рублёў, на 100 000 рублёў ніжэй за намінал. Частка ўладальнікаў гэтых купонаў, не спадзеючыся на продаж праз інтэрнэт, прапануюць сертыфікаты пакупнікам проста ў абутковых крамах.
У сацыяльных сетках пад аб'явамі аб продажы такіх сертыфікатаў віцябляне жартуюць, што, відаць, такім чынам «Марка» разлічылася з «Жылбудам» за будаўніцтва новага лагістычнага цэнтра «OUTLET Marko».
Гэты гандлёва-лагістычны цэнтр і цэнтр распродажаў на Бешанковіцкай шашы, размешчаны на месцы былой вёскі Паўлавічы, быў урачыста адкрыты 17 снежня. Будаўніцтва і аснашчэнне новага будынка абышлося ў 120 мільярдаў рублёў.
