29 снежня Гомельскім абласным судом на выязным пасяджэнні ў Лельчыцах вынесены прыгавор у дачыненні да 36-гадовага жыхара раёна. Ён абвінавачваўся на падставе артыкулаў за забойства, замах на забойства і наўмыснае знішчэнне або пашкоджанне маёмасці.
Як паведамілі ў Гомельскім абласным судзе, абвінавачваны прыгавораны да 23 гадоў пазбаўлення волі з адбываннем пакарання ва ўмовах папраўчай калоніі ўзмоцненага рэжыму. Таксама суд пастанавіў спагнаць з яго 209 млн. рублёў у лік пакрыцця ўрону, нанесенага злачынствам.
У красавіку 2015 года мужчына падпаліў фургон аўтамабіля, у якім знаходзіліся людзі. Вяртаючыся з працы ў службовым аўтамабілі, пасля сумеснага распівання спіртных напояў з калегамі, на глебе асабістых непрыязных адносін ён падпаліў выліты на падлогу ў цэнтральнай частцы фургона бензін. Сам жа выскачыў на хаду з машыны, дзе знаходзіліся восем чалавек.
Вадзіцель рэзка зменшыў хуткасць і спыніў аўтамабіль, пяць чалавек самастойна пакінулі падпалены фургон. Трое мужчын, 29, 36 і 54 гадоў, ад нанесеных цялесных пашкоджанняў памёрлі ў бальніцы. Агнём знішчаны службовы аўтамабіль і асабістыя рэчы пацярпелых.
Абвінавачваны не прызнаў сваёй віны. Паводле яго слоў, ён збіраўся прыкурыць, але не атрымалася, а запалка ўпала на падлогу, і таму адбылося ўзгаранне.
Паводле версіі следства, у дарозе абвінавачваны заснуў, а калегі нафарбавалі яму пазногці, вырашыўшы так пажартаваць. Калі мужчына прачнуўся і ўбачыў нафарбаваныя пазногці, то раззлаваўся і вырашыў адпомсціць крыўдзіцелям.
Прыгавор не набыў моц і можа быць абскарджаны.
Цяпер чытаюць
«Шынвізэ — кончаны садыст». Адзін з адыёзных начальнікаў калоніі Бабруйска перабраўся ў Германію5
Каментары