Гэтая карта з'явілася на старонках Coca-Cola ў сацыяльных сетках напярэдадні новага года, але была хутка выдаленая
Кампанія Coca-Cola афіцыйна прынесла Украіне прабачэнні за публікацыю ў сацыяльных сетках карты Расіі з Крымам. Пра гэта паведаміла ўкраінскае пасольства ў Вашынгтоне.
Паводле заявы на сайце дыпмісіі, прадстаўнік Coca-Cola Кейт Ірвін ў сераду наведала амбасаду Украіны, каб прынесці прабачэнні. Амбасада апублікавала афіцыйны ліст кампаніі, які ўручыла Ірвін.
У Coca-Cola растлумачылі, што карту падрыхтавала і апублікавала рэкламнае агенцтва, не атрымаўшы на гэта дазволу або адабрэння кампаніі. Як толькі кампанія даведалася пра пост у сацыяльнай сетцы «Укантакце», яна яго адразу ж выдаліла.
Скандал пачаўся напярэдадні новага года, калі Coca-Cola апублікавала на сваёй старонцы «Вконтакте» карту Расеі без Крымскага паўвострава. Таксама на ёй адсутнічалі Курыльскія выспы і Калінінградская вобласць. Гэта выклікала незадаволенасць некаторых карыстальнікаў «Укантакце».
Праз некалькі гадзін у паблік з'явілася абноўленая карта, ужо з Крымам. «Мы прыносім шчырыя прабачэнні за сітуацыю, якая склалася. Карта выпраўленая!» — напісала адміністрацыя старонкі.
З'яўленне карты, дзе анексаваны Расеяй Крым пазначаны як частка РФ, выклікала незадаволенасць ўжо ва Украіне. Дэпутат Вярхоўнай рады Мустафа Найем ў «Фэйсбуку» заклікаў байкатаваць прадукты кампаніі. Прыдуманы ім хештег #BanCocaCola даволі хутка выйшаў у трэнды ўкраінскага сегмента «Твітэру».
У Coca-Cola заяўляюць, што іх галоўная мэта — гэта вытворчасць напояў, а ў палітычныя праблемы кампанія не ўмешваецца. У кампаніі адзначылі, што Украіна, дзе знаходзяцца два завода Coca-Cola, з'яўляецца важным для яе рынкам.
Хто такі Міхаіл Мяховіч — сілавік, які вядзе канал ГУБАЗіКа і адказвае за прабіў людзей20
Каментары