Усё больш выпускнікоў Еўрапейскага гуманітарнага ўніверсітэта (ЕГУ) становяцца запатрабаванымі ў Беларусі, сведчаць вынікі апытання, праведзенага ў лістападзе-снежні мінулага года. Апытанне праводзілася сярод выпускнікоў, якія скончылі адукацыйныя праграмы ЕГУ ў Мінску і Вільні, паведамляе сайт ВНУ.
Па дадзеных апытання, 62,2% выпускнікоў ЕГУ жывуць у Беларусі, куды яны вярнуліся пасля навучання ў універсітэце. 83,3% рэспандэнтаў маюць пастаяннае месца працы, якое ў большасці выпадкаў цалкам або часткова адпавядае кірунку навучання ў ЕГУ.
64,6% выпускнікоў універсітэта працуюць у прыватным сектары эканомікі, 17,4% — у няўрадавых арганізацыях, 10,1% — у дзяржаўных установах Беларусі.
Пры гэтым 49,4% выпускнікоў ЕГУ зарабляюць вышэй сярэдняй штомесячнай зарплаты па Мінску. На думку арганізатараў апытання, гэта з'яўляецца «важным паказчыкам кар'ерных дасягненняў» выпускнікоў ЕГУ, а таксама сведчыць аб высокай якасці адукацыі ў ВНУ, якое «дае выпускнікам шэраг пераваг і робіць іх запатрабаванымі на рынку працы Беларусі».
Еўрапейскі гуманітарны універсітэт быў заснаваны ў Мінску ў 1992 годзе, у 2004-м — зачынены беларускімі ўладамі па ідэалагічных прычынах. Праз год універсітэт аднавіў працу ў Вільні. Ён з'яўляецца літоўскай ВНУ, але мае нефармальны статус беларускага універсітэта ў выгнанні. Фінансуе ЕГУ кааліцыя міжнародных донараў, якія падтрымліваюць універсітэт як альтэрнатыву дзяржаўным ВНУ Беларусі.
