Выраўноўванне пенсійнага ўзросту жанчын і мужчын будзе спрыяць паскарэнню тэмпаў эканамічнага росту ў Беларусі, лічыць памочнік прэзідэнта па эканамічных пытаннях Кірыл Руды.
«Існае пяцігадовае адрозненне ва ўзросце пры выхадзе на пенсію мужчын і жанчын было ўведзенае ў Беларусі ў 1932 годзе і сёння эканамічна слаба аргументаванае», — гаворыцца ў артыкуле Рудага, апублікаваным у апошнім выпуску «Белорусского экономического журнала».
Ён канстатуе, што гендарная роўнасць ў пенсійным узросце адзначаецца пераважна ў развітых краінах, а ў краінах, якія развіваюцца, з-за розных прычын (гістарычная інерцыя, культурныя асаблівасці) захоўваюцца адрозненні паміж мужчынамі і жанчынамі пры выхадзе на пенсію.
У якасці абгрунтавання для выраўноўвання (павышэння для жанчын) пенсійнага ўзросту ў Беларусі можна прывесці некалькі аргументаў, лічыць Руды. «Па-першае, жаданне працаваць. Зараз жанчыны, якія дасягнулі пенсійнага ўзросту, жадаюць атрымліваць больш высокі даход і гатовыя дзеля гэтага працаваць. У сярэднім 60% жанчын (і 50% мужчын) працягваюць працаваць на працягу яшчэ пяці гадоў пасля наступлення афіцыйнага пенсійнага ўзросту», — канстатуе памочнік прэзідэнта.
Яшчэ адным аргументам на карысць павышэння пенсійнага ўзросту Руды называе неабходнасць матэрыяльнай падтрымкі жанчын. «Жанчынам неабходнае большае матэрыяльнае забеспячэнне для падтрымкі сям'і, а адпаведна, больш працяглая кар'ера, якая аплачваецца. Гэта звязана з тым, што дзеці часцей застаюцца з маці, а колькасць скасаванняў шлюбу ў Беларусі з'яўляецца вельмі высокай. Акрамя таго, пры больш раннім выхадзе на пенсію ў жанчын знікае эканамічная незалежнасць і ўзнікаюць ўмовы для эканамічнага насілля з боку мужчын», — канстатуе Руды.
Павышэнне пенсійнага ўзросту для жанчын таксама дазволіць павялічыць працоўную сілу і агульны ўзровень прадукцыйнасці працы, дадае ён.
«Акрамя таго, гэта дазваляе скараціць дэфіцыт фонду сацыяльнай абароны насельніцтва. Выраўноўванне пенсійнага ўзросту з'яўляецца не толькі эканамічна апраўданым, але і сацыяльна справядлівым: у 2014 годзе чаканая працягласць жыцця ў беларускіх жанчын пасля выхаду на пенсію складала больш за 25 гадоў супраць 15,3 года ў мужчын», — адзначае памочнік прэзідэнта.
На яго думку, паступовае выраўноўванне пенсійнага ўзросту ў Беларусі будзе спрыяць росту ВУП больш як на 1% пачынаючы з 2019 года.
