16.01.2016 / 18:10

Бізнэс-імперыя Юрыя Чыжа перажывае цяжкія часы: «Трайпл» зацягвае паясы 29

Уплывовы бізнэсовец Юрый Чыж рэарганізуе сваю бізнэс-імперыю «Трайпл» і ўваходзіць у рэжым жорсткай эканоміі. Дадзеную інфармацыю TUT.BY пацвердзілі некалькі крыніц.

«Агульны глабальны крызіс, змена кан'юнктуры і ўнутраная нявызначанасць вымусілі ўласніка кампаніі заняцца рэарганізацыяй свайго бізнэсу», — распавёў былы супрацоўнік «Трайпла».

Паводле яго слоў, «некаторыя актывы выстаўлены на продаж, частка службаў аб'яднаная, частка персаналу звольненая».

«Пад скарачэнне трапілі тыя, хто наўпрост не прыносіць грошай: маркетынг, піяр, бухгалтэрыя, сацыялка і іншыя», — кажа ён.

Яшчэ адзін былы супрацоўнік «Трайпла» запэўнівае, што «аб скарачэнні было паведамлена загадзя, усё адбылося ў адпаведнасці з заканадаўствам».

Як стала вядома, былі аб'яднаны аддзелы збыту «Бярозаўскага КБВ» і «КварцКрэйдаПрама» на базе гандлёвага дома «Проперці Менеджмент Груп». Цяпер гэтая кампанія пры дапамозе нямецкай інжынірынгавай кампаніі Masa-Henke прасоўвае скразную гандлёвую марку SLS Group.

Юрый Чыж ужо прадаў кампанію «Аскаргатэрмінал», якая праводзіла паслугі мытнага агента ў Нацыянальным аэрапорце Мінск. Новым уласнікам кампаніі стала сумеснае прадпрыемства «Дамінік», якое валодае буйным мытным хабам у Кунцаўшчыне. Дадзеную інфармацыю пацвердзілі ў самой кампаніі, якая з 1991 года працуе на лагістычным рынку Беларусі. 47% доляў СП ТАА «Дамінік» належыць нямецкай будаўнічай Otto Alte-Teigeler, якая спецыялізуецца на будаўніцтве і рамонце бетоннага дарожнага пакрыцця і узлётна-пасадачных палос, 53% — беларускім заснавальнікам, сказана на сайце кампаніі.

Што тычыцца спорту, то і там адбываецца зразанне бюджэту.

У першую чаргу гэта тычыцца гульні нумар 1.

Юрый Чыж, які нарадзіўся ў Бярозаўскім раёне, перастаў быць галоўным спонсарам каманды першай лігі «Бяроза-2010», якая ўваходзіць у структуру мінскага «Дынама». Як паведаміў афіцыйны сайт каманды, па завяршэнні тэрмінаў арэнды і кантрактаў клуб пакінулі футбалісты, трэнерскі штаб і персанал клуба. «Цяпер адкрытым застаецца пытанне аб удзеле ФК «Бяроза-2010» у чэмпіянаце 2016», сказана ў паведамленні.

Што тычыцца мінскага «Дынама», то склад каманды таксама пакінулі некалькі ключавых гульцоў і замежных трэнераў.

Некаторым футбалістам прапанавана перазаключыць кантракты на горшых умовах. Яшчэ адзін характэрны факт. Першы вучэбна-трэніровачны збор клуб правядзе ў Мінску. Хоць раней у зімовую пару адпраўляўся на поўдзень.

Аб складанасці з уласным фінансаваннем сведчаць дадзеныя Міністэрства фінансаў, якое публікуе інфармацыю аб прыбытках і стратах эмітэнтаў аблігацый. За тры кварталы 2015 «Трайпл», асноўная дзейнасць якога паказаная як «вытворчасць прадуктаў нафтаперагонкі», меў выручку 123 млрд рублёў і чыстую страту 51,5 млрд рублёў.

Пра тое, што ў ўплывовага бізнэсмэна паўсталі складанасці з фінансамі, TUT.BY распавядалі крыніцы яшчэ некалькі месяцаў таму, неўзабаве пасля затрымання Уладзіміра Япрынцава, шматгадовага партнёра Юрыя Чыжа.

«Рэарганізацыя, справа, якую задумаў Чыж, па часе супала з тымі падзеямі і, верагодна, стала іх наступствам», — упэўненыя нашы суразмоўцы. «Нафтаперапрацоўка ўжо не прыносіць вялікага прыбытку. Надламала яго [Юрыя Чыжа], вядома, гісторыя з шматфункцыянальным комплексам каля цырка», — дадаюць крыніцы. Раней мэр Мінска Андрэй Шорац казаў пра тое, што адна з структур «Трайпла» вядзе перамовы аб яго продажы.

«У «Трайпла» некаторыя аб'екты знаходзяцца ў лізінгу або закладзе ў банкаў. Чыж не ўсюды сам сабе гаспадар», — кажа былы працаўнік кампаніі. «У Юрыя Аляксандравіча па-ранейшаму высокі крэдытны рэйтынг», — іранізуе яго знаёмы, у якога карэспандэнт TUT.BY пацікавіўся фінансавым самаадчуваннем «Трайпла».

У лістападзе «Трайпл» быў самым буйным эмітэнтам жыллёвых аблігацый, забяспечыўшы 60% усяго аб'ёму эмісіі, піша агенцтва «Бізнес-Навіны». Было зарэгістравана пяць выпускаў аблігацый на агульную суму звыш 164 млрд рублёў. Кампанія пачала прыцягваць інвестыцыі з боку грамадзян для будаўніцтва жылога комплексу ва Уруччы.

Атрымаць каментар у кампаніі «Трайпл» не ўдалося.

0
Жвір / Адказаць
16.01.2016 / 18:23
pena osedaet
0
Майдан / Адказаць
16.01.2016 / 18:26
Хопиць ужо супакойваць.
0
alex / Адказаць
16.01.2016 / 19:37
Глядзiш, i свiнаферму Маладзечне не падкладзе.
Паказаць усе каментары/ 29 /
Каб пакінуць каментар, калі ласка, актывуйце JavaScript у наладах свайго браўзеру