Брат канадскай спявачкі Селін Дыён памёр ад раку праз два дні пасля таго як ад той жа хваробы памёр яе муж. Аб гэтым піша Journal de Montreal.
59-гадовы Даніэль Дыён памёр у хоспісе раніцай у суботу, 16 студзеня. Побач з ім былі блізкія сваякі, у тым ліку 89-гадовая маці Тэрэза Дыён. У яго засталіся дзве дачкі.
У Даніэля Дыёна быў рак гартані, языка і галаўнога мозгу.
Даніэль Дыён быў восьмым з 14 дзяцей у сям'і. Па словах старэйшай сястры спявачкі, Кладэт Дыён, Даніэль быў таксама «знакамітым музыкам».
14 студзеня ў ЗША ва ўзросце 73 гадоў памёр Рэнэ Анжэліл - муж і менеджэр Селін Дыён. Ён памёр ва ўласным доме ў Лас-Вегасе пасля працяглай барацьбы з ракам гартані. Упершыню анкалагічнае захворванне ў яго было выяўлена ў 2000 годзе, у 2013-м здарыўся рэцыдыў.
