Намесьніца старшыні райвыканкаму Н. Бурунова адмовіла мясцовым актывістам у просьбе правесьці пікет у абарону звольненага за палітычную дзейнасьць старшыню Гарадоцкай суполкі ПБНФ, актывіста незарэгістраванага Руху «За Свабоду» Леаніда Аўтухова.
У адказе чыноўніцы гаворыцца, што «Законам «Аб масавых мерапрыемствах у Рэспубліцы Беларусі» такі від масавага мерапрыемства, як пікет, не прадугледжаны. Гэтым Законам прадугледжаны наступныя віды мерапрыемстваў: сход, мітынг, вулічнае шэсьце, дэманстрацыя, пікетаваньне і іншыя масавыя мерапрыемствы культурнага, спартыўнага значэньня».
Дэмакратычныя актывісты Гарадку рыхтуюць паўторны зварот да мясцовай адміністрацыі з просьбай правесці 23‑24 красавіка менавіта «пікетаваньне». Падчас мерапрыемства актывісты плянуюць распаўсюджваць інфармацыю пра звальненьне Леаніда Аўтухова, патрабваць яго аднаўленьня на працы і выступаць супраць кантрактнай сыстэмы як сродку барацьбы з іншадумствам.