Своеасаблівы саюз паміж апазіцыйнымі, нацыяналістычнымі СМІ і ўладнымі структурамі Беларусі намеціўся яшчэ летась і быў выкліканы падзеямі ў Крыме і ў Данбасе, заявіў 22 студзеня агенцтву Eurasia Daily (EADaily) Кірыл Авяр'янаў-Мінскі, які раней жыў у Беларусі, але з'ехаў у Расію, або Вялікаросію, як піша ён сам.
Кірыл Авяр'янаў-Мінскі. Фота з асабістай старонкі
Гэты палітолаг ўжо называў беларускі народ штучным фарміраваннем («ніякага» братняга народа» у экс-БССР няма»), абвінавачваў Лукашэнку ў «самасційнай ерасі» і дапускаў верагоднасць абвяшчэння «народных рэспублік на ўсходзе (а потым, магчыма, і на захадзе) сённяшняй РБ».
На гэты раз Авяр'янава зачапіла гісторыя настаўніцы фізікі і астраноміі мазырскага ліцэя Кацярыны Кашо, якая пад нікамі @Russian Girl і @_belka_strelka пісала гнеўныя пасты пра «хахлоў» і «да***баў». З часам стала вядома, што блогерка больш у ліцэі не працуе: звольнілася «па ўласнай ініцыятыве». Журналісты спрабавалі звязацца з самой мазырскай настаўніцай, але тая адмовілася што-небудзь каментаваць.
Сыход Кацярыны Кашо са школы Авяр'янаў называе чарговым прыкладам партнёрства паміж нацыяналістамі і ўладай у Беларусі.
«Мы можам ўзгадаць гісторыю з помнікам Пушкіну ў Магілёве, — піша Авяр'янаў, — калі пасля істэрыкі ў нацыяналістычных СМІ ўлады горада прыбралі з помніка таблічку з вершам «Клеветнікам Россіі», напісаным у сувязі з разгромам Польскага паўстання 1830-31 гадоў. Рэч у тым, што польскі мяцеж лічыцца нацыяналістамі беларускім вызваленчым паўстаннем. Таксама можна ўзгадаць гісторыю з віцебскай газетай «Наша праваслаўе», калі пасля публікацыі ў апазіцыйнай прэсе выданню было вынесена папярэджанне Міністэрства інфармацыі».
У сакавіцкім нумары газеты за 2015 год была надрукавана гутарка з Маргарытай Зайдлер, грамадзянкай Германіі, якая ваюе на баку баявікоў «Наваросіі». Зайдлер заклікала праваслаўных вернікаў да ўдзелу ў гэтай вайне. Многія задаліся пытаннем, ці не было ў тым матэрыяле «прапаганды вайны», якая падпадае пад артыкул 123 КК Рэспублікі Беларусь. А мінінфарм зрабіў адпаведную выснову.
«Пасля Крыма і Наваросіі Лукашэнка перайшоў да даволі нацыяналістычнай рыторыкі, адпавяднай той, якой ужо шмат гадоў прытрымліваецца апазіцыя, якая да апошняга часу жорстка крытыкавала беларускага прэзідэнта», — робіць выснову палітолаг.
«І гісторыя з Кацярынай Кашо акурат з'яўляецца чарговым прыкладам такога «прыватна-дзяржаўнага» партнёрства», — рэзюмаваў Авяр'янаў-Мінскі для Eurasia Daily.
