Прэзідэнт Расіі Уладзімір Пуцін пракаментаваў сваё выказванне на адрас Уладзіміра Леніна, якога на мінулым тыдні ён абвінаваціў у развале ССCР. Па словах прэзідэнта, той заклаў міну запаволенага дзеяння пад расейскую дзяржаўнасць.

«Я меў на ўвазе дыскусію паміж Сталіным і Леніным з нагоды таго, як будаваць новую дзяржаву — Савецкі Саюз», — растлумачыў Пуцін на форуме Агульнарасійскага народнага фронту.

Кіраўнік дзяржавы нагадаў, што Сталін сфармуляваў ідэю аўтанамізацыі СССР, у адпаведнасці з якой «суб'екты будучай дзяржавы павінны былі ўвайсці ў СССР на аснове аўтаноміі з шырокімі паўнамоцтвамі» [як потым у складзе Расіі былі, напрыклад, Комі АССР, паволжскія рэспублікі, Ленін прапанаваў, каб былі асобныя БССР, УССР і г.д. — НН]. Пры гэтым Ленін палічыў яе няправільнай, патлумачыў Пуцін.

Па словах прэзідэнта, Ленін выступаў за тое, каб СССР утварыўся на аснове поўнага раўнапраўя з правам выхаду з саюза. «Пры гэтым межы вызначаліся зусім адвольна і далёка не заўсёды абгрунтавана. На Украіну, напрыклад, Данбас перадалі. З якой падставай: павышэнне адсотка пралетарыяту на Украіне для таго, каб мець там вялікую сацыяльную падтрымку. Гэта жах нейкі», — заявіў Пуцін.

Кіраўнік расійскай дзяржавы адзначыў, што пазіцыя Леніна па дзяржпабудове нароўні з неэфектыўнай эканамічнай і сацыяльнай палітыкай прывяла да распаду СССР. «Гэта і ёсць міна запаволенага дзеяння. А што ж гэта інакш? Менавіта так яно і ёсць», — канстатаваў расійскі лідар, падкрэсліўшы, што неабходна старанна аналізаваць «усё, што было ў ранейшыя часы».

«Нельга адно: мазаць чорнай фарбай ўсё, што было ў мінулым, або ў вясёлкавых танах глядзець на тое, што адбываецца сёння», — сказаў на заканчэнне Пуцін.

Хочаш падзяліцца важнай інфармацыяй ананімна і канфідэнцыйна?