27.01.2016 / 20:55

У Вільні пачаўся суд па справе аб крывавых падзеях студзеня 1991 года 5

У Віленскім акруговым судзе пачаліся слуханні па справе аб студзеньскіх падзеях 1991 года ў Літве, абвінавачанымі па якім праходзяць былыя савецкія вайскоўцы, чыноўнікі, супрацоўнікі КДБ і МУС, цяпер грамадзяне Расіі.

Савецкія танкі на вуліцах Вільні. фота vilnews.com

Паводле дадзеных боку абвінавачання, 13 студзеня 1991 года пры спробе штурму савецкімі вайскоўцамі тэлевежы і будынка радыётэлецэнтра ў Вільні загінулі 14 чалавек, больш за тысячу атрымалі раненні, у тым ліку 31 чалавек — цяжкія.

Пацярпелымі па справе прызнаныя каля 500 чалавек, абвінавачанымі — 65, але на лаве падсудных толькі двое — грамадзяне Расіі Юрый Мель і Генадзь Іваноў.

Астатнія абвінавачаныя, у тым ліку экс-міністр абароны СССР Дзмітрый Язаў, начальнік Віленскага гарнізона савецкай арміі Аляксандр Усхопчык, былы афіцэр КДБ Міхаіл Галаватаў, былыя партыйныя функцыянеры Уладзіслаў Швед і Альгімантас Наўджунас жывуць за мяжой — як мяркуецца, у Расіі.

За час слуханняў суду трэба апытаць каля тысячы сведак.

Падсудных, якіх вінавацяць у здзяйсненні ваенных злачынстваў і злачынстваў супраць чалавечнасці ў сувязі з разгонам руху за незалежнасць Літвы, абараняюць каля 60 адвакатаў.

Абаронцы віленскага тэлецэнтра спрабуюць спыніць савецкі танк. Пад гусеніцы трапіла адна з мітынгоўцаў. Фота vilnews.com

Пракуратура адзначае, што на гэтыя злачынствы не распаўсюджваецца тэрмін даўнасці.

Пасля выканання неабходных фармальнасцяў боку працэсу дамовіліся аб пачатку слуханняў па сутнасці 29 студзеня.

0
Дзед Талаш / Адказаць
27.01.2016 / 22:16
Чакаем суду па "Договору о передаче Литовской Республике города Вильно и Виленской области и о взаимопомощи между Советским Союзом и Литвой» от 10 октября 1939 года". А потым - па перадачы горада Друскенікі сталінскай ўладай Літоўскай Рэспубліцы ў 1940 годзе на падставе сфальсіфікаваных літоўскімі гісторыкамі дадзеных, і пад пагрозай рэпрэсій.
0
Раман / Адказаць
28.01.2016 / 01:06
2 Дзед Талаш Колькі ў 1939 годзе было беларускіх школ у Вільні? Адна. Літоўскіх? Пяць. Колькі ў 2016 годзе літоўскіх школ у Вільні? Пяцьдзясят (польскіх шэсьць, расійскіх дванаццаць). Беларускіх? Адна (напалову руская). Колькі ў 2016 годзе беларускіх школ у Менску?.. І каго за гэта трэба судзіць?
0
Гісторык / Адказаць
28.01.2016 / 01:11
Пуцін зь Мядзьведзевым у 2009 годзе далі путчысту Язаву ордэн, а ў канцы 2014 году віншавалі яго ў Крамлі з 90-годзьдзем. Забойцы там заўсёды ў цане.
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру