Пэп Гвардыёла зменіць Мануэля Пелегрыні на пасадзе галоўнага трэнера «Манчэстар Сіці» ў канцы сезону. Як абвясціла кіраўніцтва клуба, кантракт з іспанцам разлічаны на тры гады.
Пелегрыні паведаміў, што завершыць працу ў клубе 30 чэрвеня. Паводле яго слоў, з нагоды яго сыходу было мноства спекуляцый, таму ён хацеў бы адразу заявіць, што нічога не рабілася за яго спіной.
У яго афіцыйнай заяве гаворыцца, што ён цалкам падтрымлівае рашэнне кіраўніцтва клуба.
У апошнія некалькі гадоў 45-гадовы Гвардыёла трэніраваў мюнхенскую «Баварыю». Да гэтага ён вельмі паспяхова працаваў у сваім родным клубе — «Барселоне».
Пелегрыні — чыліец, шмат гадоў паспяхова працаваў у Іспаніі, — узначаліў «Ман Сіці» ў 2013 годзе. Пад яго кіраўніцтвам клуб стаў чэмпіёнам Англійскай прэм'ер-лігі і ўладальнікам Кубка футбольнай лігі.
