Ferrari 335S Spider Scaglietti 1957 года выпуску прададзены з аўкцыёну ў Парыжы амаль за $31,4 млн, паведамляюць інфармагенцтвы.

artcurial.com

Спорткар, паводле прагнозаў экспертаў, абяцаў стаць самым дарагім з прададзеных за ўвесь час рэтрамабіляў. Аднак цана на яго не абышла пастаўлены раней рэкорд: Ferrari 250 GTO Berlinetta быў прададзены ў 2014 годзе за $38,1 млн.

Мадэль Ferrari 335S Spider Scaglietti выпускаў італьянскі аўтаканцэрн з 1957 па 1958 год. Прададзены спорткар удзельнічаў у папулярных гонках на цягавітасць «Міле Мілья», «24 гадзіны Ле-Мана» і «12 гадзін Себрынга». За яго рулём выступалі знакамітыя гоншчыкі свайго часу, у прыватнасці першы брытанскі чэмпіён «Формулы-1» Джон Майкл Хотарн, Сцірлінг Мос, Пітэр Колінз і іншыя.

Пасля таго як спорткар перастаў удзельнічаць у гонках, яго купіў архітэктар з Пенсільваніі. У 1970-м машыну набыў французскі калекцыянер П'ер Бардзінон. Бардзінон памёр у 2012 годзе, але аўто было прададзена ад яго імя.