У Беларусі правядуць праверку гатоўнасці войскаў тэрытарыяльнай абароны. Такое даручэнне даў сёння Аляксандр Лукашэнка, выступаючы перад удзельнікамі збору па тэрытарыяльнай абароне.
Па камандзе кіраўніка краіны ў Беларусі будуць задзейнічаны войскі тэрытарыяльнай абароны. «Дзяржсакратарыяту даручаю, каб у нейкі прамежак часу (трэба выбраць гэты час) мы маглі па маёй камандзе задзейнічаць войскі тэрытарыяльнай абароны ў раёне, горадзе і на іншай тэрыторыі ў маштабах вобласці. Паглядзім, як дзейнічаюць войскі тэрытарыяльнай абароны», - сказаў Аляксандр Лукашэнка.
Кіраўнік дзяржавы адзначыў, што ў Беларусі ёсць планы прымянення войскаў тэрытарыяльнай абароны, вызначаны аб'екты, якія яны павінны ахоўваць. Аляксандр Лукашэнка падкрэсліў, што яго непакоіць іншае: «Планы ёсць, аб'екты ёсць, паперы ёсць, людзі, камандзіры і іншае, а ці гатовы мы дзейнічаць у ваенных умовах і задзейнічаць усю тэрытарыяльную абарону?».
У мірны час органамі кіравання тэрытарыяльнай абароны з'яўляюцца Генеральны штаб, мясцовыя органы ўлады, ваенныя камісарыяты. Кіраўнік краіны падкрэсліў, што трэба, каб кожны генерал-губернатар, старшыня гарвыканкама ведалі, як дзейнічаць, мелі ўяўленне аб колькасным складзе войскаў тэрытарыяльнай абароны, былі знаёмы з канкрэтнымі людзьмі, і не толькі з ліку камандзіраў. Акрамя таго, кіраўнік дзяржавы даручыў, каб быў сфарміраваны запас узбраенняў і іншых матэрыяльных рэсурсаў для войскаў тэрытарыяльнай абароны. «Мы павінны ўсё гэта адпрацаваць, каб губернатар ведаў такую тэму гэтак жа, як ён ведае тэхналогію, напрыклад, пасяўной кампаніі», - сказаў Аляксандр Лукашэнка. Ён дадаў, што гэта датычыцца і старшынь гар- і райвыканкамаў. Як падкрэсліў ён, тых з іх, хто не валодае гэтым пытаннем, неабходна навучыць, а астатнім стварыць умовы, каб абнавіць іх веды, прайшоўшыся такім чынам па ўсёй вертыкалі мясцовай улады.
