15.04.2008 / 15:16

Гульні з мутантам 17

Зараз расейскі арол нацэліцца дзвюма глюгамі. Піша ў сваім блогу Аляксандар Класкоўскі.


Пуцін чакана згадзіўся стаць прэм'ерам. А звыш таго яшчэ і старшынём "Адзінай Расеі". Другі тытул зусім не сінэкура. Калі на Захадзе прэзыдэнтаў у такой фазе называюць "кульгавымі качкамі", то Пуцін акурат закасаў рукавы. Ён актыўна пераструктуроўвае ўсю сыстэму расейскай улады, ствараючы пад сябе моцныя вагары. Як гэтыя пэртурбацыі адаб'юцца на Беларусі?

Хтосьці прагназуе, што новы прэзыдэнт і новасьпечаны прэм'ер абавязкова сутыкнуцца лбамі. Калі самі і ня хочуць, дык кланы іх уцягнуць у клінч. І вось тады, маўляў, для беларускага афіцыйнага кіраўніка надыдзе час палавіць рыбку ў мутнай расейскай вадзе. Намякаюць, што невыпадкова купіў кватэру ў Траецкім адзін маскоўскі тэлевядоўца з рэпутацыяй піяр-кілера. І што цераз лорда Бэла абмяркоўваецца нібыта зусім ня той плян, пра які гудуць прафаны.

Па мне, дык гэтыя пэрыядычныя гіпотэзы пра новы паход на Маскву — са сфэры ненавуковай фантастыкі. Зараз беларускаму кіраўніку не да таго. Тут бы ацалець, каб не задушылі газавымі коштамі ды не засмакталі паўзучай інкарпарацыяй.

Палітоляг Валер Карбалевіч мяркуе так: "Ці будзе канкурэнцыя між двума расейскімі лідэрамі, ці ня будзе яе — гэта мала паўплывае на дачыненьні Масквы зь Менскам. Хутчэй тут будуць мець уплыў геапалітычныя чыньнікі, і ў прыватнасьці — працэс руху Ўкраіны ў НАТО. Вось на гэтым тле Лукашэнка можа тое-сёе выйграць. У Расеі ж пасьля страты пазыцыяў зюганаўцамі ў яго няма сур'ёзнага ідэалягічнага апірышча. Спробы згуляць на магчымых супярэчнасьцях між Мядзьведзевым і Пуціным нічога не дадуць".

Як бачым, пераседзець Пуціна Лукашэнку пакуль што не пашэнціла. Палкоўнік КГБ, які нічога не забывае, застаецца пры ўладзе. Зь іншага боку, да ўлады прыходзіць чалавек, які не адзін год фактычна стаяў на чале "Газпрому". І які пэўна ж будзе гнуць лінію на пасьлядоўнае ўвасабленьне "эўрапейскай формулы", што для Беларусі на сьмерць падобная.

Карацей, пэрспэктыва мець стасункі з "Пуцьведзевым" Лукашэнку наўрад ці падаецца ружовай. Зараз расейскі дзьвюхгаловы арол з сымбалю можа ператварыцца ў рэальнага мутанта, які пачне дзяўбці дзьвюма глюгамі.

Аляксандар КЛАСКОЎСКІ

0
Саянаў / Адказаць
15.04.2008 / 15:45
Зараз расейскі арол нацэліцца дзвюма глюгамі. Піша ў сваім блогу Аляксандар Класкоўскі. ============================= Во даюць! Зараз нацэліцца! Зараз! Зараз??? Бу-Га-Га! Дзесяць разоў Бу-Га-Га! Аўтар,ці вы ўчора нарадзіліся? Хіба што так...
0
Аляксандар КЛАСКОЎСКІ 2 Саянаў / Адказаць
15.04.2008 / 16:09
Аўтар,ці вы ўчора нарадзіліся? ========= Трохі раней. Ва ўсякім разе, маю гонар ўжо ня першы год чытаць пад сваімі артыкуламі камэнтары шаноўнага сп. Саянава :)
0
Саянаў / Адказаць
15.04.2008 / 18:05
Ва ўсякім разе, маю гонар ўжо ня першы год чытаць пад сваімі артыкуламі камэнтары шаноўнага сп. Саянава :) ================================== Ну,значыць ёсьць нагода чакаць на рост якасьці аналітычных развагаў у вашых артыкулах ! Заставаймася разам!
Паказаць усе каментары/ 17 /
Каб пакінуць каментар, калі ласка, актывуйце JavaScript у наладах свайго браўзеру