У сваім ЖЖ ён апісвае выпадак, што здарыўся зь ім у Менску, і які каштаваў яму здароўя і грошай.
Гісторыя адбылася 13 красавіка на праспэкце Пераможцаў. Паводле Сяргея, яго аўто, у якім акрамя яго ехалі яшчэ два чалавекі, спыніў супрацоўнік ДАІ, які паведаміў кіроўцу пра перавышэньне хуткасьці і запрасіў прайсьці ў аўто. Там, як піша Астроўскі, яму пачалі намякаць на неабходнасьць даць хабар.
Пасьля адмовы і абяцаньня напісаць у пратаколе пра вымаганьне грошай, яго нібыта пачалі зьбіваць: старшы супрацоўнік, які сядзеў ззаду, душыў за горла, а малодшы, што быў за стырном, біў па скроні і сківіцы. ДАІшнікі, як піша расеец, паспрабавалі ізноў узьняць пытаньне «кампэнсацыі», але пачуўшы адмову, абвінавацілі яго ў нападзе на супрацоўнікаў міліцыі і адвезьлі ў пастарунак. Потым была праверка на наяўнасьць алькаголю ў крыві, якая нічога не выявіла, і адмова мэдыкаў зьняць пабоі. Ноч затрыманы правёў у ізалятары на Акрэсьціна, які ён назваў «часовай турмой на ўскраіне гораду».
Вось як ён апісвае апартамэнты ў гэтым шмат каму вядомым месцы: «У камэры вялізная драўляная лава. Старажылы называюць яе «сцэнай». У куце ўнітаз на прагнілых дошках. І кран. Смурод і бруд — жахлівыя. Холад — таксама. Туалетнай паперы, коўдраў ды іншага — канечне ж няма (…) А 7‑й раніцы — сьняданак, пададзены праз акенца ў дзьвярах. Палова бохан хлеба, пустая аўсянка, гарбата ў алюміневым кубку без ручкі, больш падобная на памыі».
Затым быў разгляд справы ў судзе Цэнтральнага раёну, дзе Сяргею Астроўскаму далі штраф у памеры 3 базавых велічыняў…за нецэнзурную лаянку, сьведкамі якой сталі пільныя супрацоўнікі ДАІ. Судзіла расейца судзьдзя Тацяна Паўлючук.
Цяпер С. Астроўскі рыхтуецца да суда, ён мае намер дамагчыся справядлівасьці і пакараць беларускіх ДАІшнікаў.