Пашпарт грамадзяніна Украіны ў выглядзе ID-карты пакуль не разглядаецца як сапраўдны дакумент для перасячэння беларускай мяжы, паведаміла прэс-служба Дзяржпагранкамітэта.
З 1 студзеня 2016 года ва Украіне ўведзеныя ўнутраныя пашпарты новага ўзору ў выглядзе пластыкавай ID-карты. «Украінскія грамадзяне памылкова разлічваюць уехаць на тэрыторыю Рэспублікі Беларусь па гэтых новых электронных дакументах», — зазначыла прэс-служба.
«Згодна з дзейнай двухбаковай дамовай паміж Рэспублікай Беларусь і Украінай ад 2009 года аб бязвізавых паездках грамадзян новы ўкраінскі пашпарт у выглядзе ID-карты не прадугледжаны як дакумент для пропуску праз дзяржаўную мяжу Беларусі», — растлумачылі ў пагранкамітэце.
Акрамя таго, украінскі бок да гэтага часу не ініцыяваў працэдуры паміж МЗС аб прызнанні ID-карт у якасці сапраўднага дакумента для перасячэння мяжы ў рамках бязвізавых паездак.
«Да ўрэгулявання гэтых пытанняў беларускі бок можа прапускаць праз мяжу грамадзян Украіны толькі па сапраўдных дакументах: замежных пашпартах (для ўладальнікаў ID-карт) і ўнутраных пашпартах старога ўзору (у папяровым выглядзе)», — падкрэсліла прэс-служба ДПК.
