Фота Сяргея Зініна

Пра гэта паведаміла галоўны сіноптык Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Святлана Рыбакова.

«Сакавік — пераходны месяц ад зімы да вясны. І яму ўласцівыя як па-вясноваму цёплае надвор'е, так і вяртанне халадоў. У гэтыя выходныя да нас зноў вернецца зімовы характар надвор'я. Ужо ў бліжэйшыя суткі тэрыторыя Беларусі апынецца пад уплывам актыўнага атмасфернага фронту, за якім будзе паступаць халоднае паветра паўночных шырот», — падкрэсліла галоўны сіноптык.

У пятніцу чакаецца няўстойлівае ветранае надвор'е. Ноччу месцамі, а днём на большай частцы тэрыторыі краіны пройдуць ападкі ў выглядзе дажджу, які будзе пераходзіць у мокры снег. На асобных участках дарог утворыцца галалёдзіца. Днём у многіх раёнах узмоцніцца вецер парывамі да 15—18 м/с. Тэмпература паветра на працягу сутак складзе ад мінус 2 да плюс 4, днём па поўдні краіны яшчэ будзе да 7 градусаў цяпла.

У выходныя дні тэрыторыя Беларусі будзе знаходзіцца пад уплывам атмасферных франтоў і халодных паветраных мас, якія перамяшчаюцца са Скандынаўскага паўвострава. Ападкі будуць выпадаць у выглядзе снегу, так што ўсталюецца невялікае снежнае покрыва.

У суботу, 19 сакавіка, на большай частцы тэрыторыі краіны пройдзе кароткачасовы снег. На дарогах будзе слізка.

Тэмпература паветра ўначы складзе 2-9 градусаў марозу, пры праясненнях паветра астудзіцца да мінус 10 — мінус 12 градусаў,

днём будзе ад 5 градусаў ніжэй за нуль па паўночным усходзе да 2 градусаў цяпла па паўднёвым захадзе краіны.

У нядзелю, 20 сакавіка, на большай частцы тэрыторыі прагназуецца снег, мокры снег.

Найбольш некамфортныя ўмовы чакаюцца ноччу і раніцай — у асобных раёнах будзе ісці моцны снег, завіруха, магчыма ўзмацненне ветру парывамі да 15—20 м/с, па паўднёвым захадзе краіны — наліпанне мокрага снегу.

На дарогах месцамі захаваецца галалёдзіца. Тэмпература паветра ўначы складзе ад мінус 1 - да мінус 8, па паўночным усходзе слупкі тэрмометраў апусцяцца да 11 градусаў марозу, днём будзе ад 5 градусаў ніжэй за нуль па паўночным усходзе да 3 градусаў вышэй за нуль па паўднёвым захадзе краіны.

У пачатку наступнага тыдня захаваецца няўстойлівае з паніжаным тэмпературным рэжымам надвор'е.

У панядзелак, 21 сакавіка, часам чакаецца снег, мокры снег. На асобных участках дарог захаваецца галалёдзіца. Тэмпература паветра ўначы складзе 1—8 градусаў марозу, пры праясненнях — да 9-11 градусаў ніжэй за нуль, днём будзе ад мінус 4 да плюс 3, па паўднёвым захадзе прагназуецца 4-6 градусаў цяпла.

У аўторак-сераду, 22-23 сакавіка, з ростам атмасфернага ціску надвор'е пачне паляпшацца, але па начах будзе яшчэ марозна. Месцамі пройдзе кароткачасовы снег, мокры снег. На асобных участках дарог — галалёдзіца.

Тэмпература паветра ўначы складзе 1—8 градусаў марозу, пры праясненнях паветра астудзіцца да мінус 9 — мінус 15, днём чакаецца ад мінус 4 да плюс 3, па паўднёвым захадзе да 6 градусаў цяпла.

Хочаш падзяліцца важнай інфармацыяй ананімна і канфідэнцыйна?