У першы поўны дзень свайго візіту на Кубу прэзідэнт ЗША Барак Абама правёў перамовы з кубінскім лідарам Раўлем Кастра.
У ходзе прэс-канферэнцыі па выніках перамоў Рауль Кастра заявіў аб згодзе з прэзідэнтам Абамам адносна неабходнасці паглыблення двухбаковага супрацоўніцтва ў барацьбе з вірусам Зіка. Разам з тым Кастра ацаніў як пазітыўныя, але «недастатковыя» нядаўнія меры Абамы па змякчэнні гандлёвых і транспартных абмежаванняў.
Па словах кубінскага лідара, у гутарцы з прэзідэнтам ЗША ён хацеў падняць пытанне аб сітуацыі ў Венесуэле, але на гэта не хапіла часу. Ён адзначыў таксама, што паміж ЗША і Кубай існуюць глыбокія адрозненні, якія ніколі не знікнуць. Кастра выказаўся таксама супраць таго, што ён ахарактарызаваў як «палітычныя маніпуляцыі правамі чалавека» Паводле яго слоў, ЗША і Куба павінны прымяніць на практыцы мастацтва цывілізаванага суіснавання. Кастра заявіў, што амерыканскае эмбарга і турма ў Гуантанама застаюцца перашкодамі на шляху нармалізацыі двухбаковых адносін.
Выступаючы на прэс-канферэнцыі, прэзідэнт Абама падкрэсліў, што амерыканскі народ адчувае сяброўскія пачуцці да Кубы. Па словах Абамы, ЗША гатовыя да ўсталявання з Кубай новых эканамічных сувязяў, якія дапамогуць стварэнню новых працоўных месцаў для амерыканцаў і кубінцаў.
Прэзідэнт ЗША выказаў удзячнасць кубінскаму лідару за дух адкрытасці, выяўлены ў ходзе перамоваў.
Разам з тым Абама падкрэсліў, што двухбаковыя адносіны не могуць змяніцца ў раптоўна. Паводле яго слоў, дыскусіі па пытанні аб правах чалавека паміж ім і Раулем Кастра былі адкрытымі і шчырымі.
Прэзідэнт ЗША канстатаваў, што лёс Кубы вырашаецца не ў ЗША: яго вырашаць самі кубінцы.
Перамовы ў Палацы Рэвалюцыі ў Гаване сталі чацвёртай сустрэчай лідараў дзвюх краін за апошнія гады. У 2013 годзе яны правялі кароткую сустрэчу на пахаванні Нэльсана Мандэлы ў ПАР, а ў красавіку мінулага года сустракаліся на рэгіянальным саміце ў Панаме.
