25.03.2016 / 16:40

Школьнікі змогуць наведваць футбольныя матчы ў Брэсце бясплатна 1

Матчы чэмпіянату краіны па футболе ў Брэсце школьнікі будуць наведваць бясплатна, паведаміла сёння на прэс-канферэнцыі загадчыца сектара спорту і турызму гарвыканкама Алеся Округ.

«Гэта зроблена, каб прыцягнуць дзяцей на стадыён, для папулярызацыі футбола, здаровага ладу жыцця. Падрыхтаваныя сезонныя абанементы, пасля 2 красавіка мы іх размяркуем па школах. Вучні на матчы будуць прыходзіць групамі ў суправаджэнні настаўнікаў фізкультуры. У выхадныя дні, летні час пропуск дзяцей да 14 гадоў будзе таксама бясплатным. Але пры ўмове, што дзіця суправаджае дарослы», — падкрэсліла Алеся Округ.

Для навучэнцаў школ, гімназій, ліцэяў Брэста на стадыёне «Брэсцкі» выдзелена 1 тыс. сесцаў у 8, 9 (усходняя трыбуна) і 10 (заходняя трыбуна) сектарах. Акрамя таго, 600 бясплатных месцаў зарэзервавана для хлопчыкаў і дзяўчат, якія займаюцца ў абласным цэнтры алімпійскага рэзерву, секцыях па футболе ў Брэсцкім, Жабінкаўскім, Маларыцкім, Камянецкім, Пружанскім, Кобрынскім раёнах.

Яшчэ адным новаўвядзеннем цяперашняга сезону з'яўляецца арганізацыя сямейнага (№17) сектара. Ён адведзены спецыяльна для заўзятараў, якія хочуць паназіраць за гульнёй разам са сваімі дзецьмі.

Таксама перад кожным матчам чэмпіянату краіны па футболе на тэрыторыі спарткомплексу будзе разгорнутая зона гасціннасці. Яе плануецца аформіць у бела-сініх колерах клуба «Дынама-Брэст». Яна разлічана на 100 пасадачных месцаў. Будуць працаваць тры кропкі грамадскага харчавання, дзе заўзятары змогуць купіць кулінарную прадукцыю, ахаладжальныя напоі, марозіва. «Зона гасціннасці будзе адкрывацца за 2 гадзіны да пачатку футбола і заканчваць працу праз паўгадзіны пасля яго заканчэння. Тут глядач, заўзятар зможа падсілкавацца, адпачыць, пагутарыць на футбольныя тэмы з аднадумцамі. Побач будзе працаваць дзіцячая пляцоўка», — распавёў дырэктар спарткомплексу Казімір Рынгевіч.

Футбольны сезон у Беларусі стартуе 2 красавіка ў Брэсце матчам паміж мясцовым «Дынама» і чэмпіёнам краіны — барысаўскім БАТЭ.

0
ЛЯВОН / Адказаць
28.03.2016 / 22:15
А не падман гэта...? Бацькі, якія працуюць на прадпрыемствах ЗАПЛАЦЯЦЬ... Дзед беларус кажа: ТАКАЯ ПРАКТЫКА ЧЫНОУНІКАУ УЛАД! Няужо не так, ці ізь фондау дырактароу прадпрыемств, камытэтау,мыныстэрст.. ГЭТА ТРЭБА ПАКАЗАЦЬ, ЯК У БЕЛАРУСІ ЛЮБЯЦЬ УСЕ СПОРТ! ПА РАЗНАРАДЦЫ...
Каб пакінуць каментар, калі ласка, актывуйце JavaScript у наладах свайго браўзеру