Танкі Abrams на вучэннях у Латвіі, фота AFP
Пентагон плануе пашырыць ваенную прысутнасць ва Усходняй Еўропе ў лютым 2017 года і размесціць у рэгіёне дадатковую, трэцюю бранятанкавую брыгаду для стрымлівання расійскай агрэсіі, паведамляе Associated Press са спасылкай на заяву амерыканскага абароннага ведамства.
Брыгада будзе налічваць 4,2 тыс. салдат, а таксама сотні адзінак цяжкай тэхнікі, танкаў, артылерыйскіх установак і іншых аб'ектаў. Як удакладняе The Wall Street Journal, гаворка ідзе аб размяшчэнні ў рэгіёне 250 адзінак — танкаў, баявых машын пяхоты Bradley, а таксама артылерыйскіх установак Paladin. Акрамя гэтага, перакінутыя будуць 1700 дапаможных сродкаў.
Прадстаўнік Пентагона Лаура Сіл патлумачыла, што адпраўка брыгады і тэхнікі дазволіць ведамству таксама папрактыкавацца ў здольнасці хуткага размяшчэння абсталявання і сіл у Еўропе. «Гэта самае мадэрнізаванае абсталяванне, якое можа прапанаваць [амерыканская] армія, яно на працягу наступнага года заменіць менш сучаснае абсталяванне, якое мы размяшчалі ў Еўропе ў апошнія гады», - сказала яна.
Намеснік кіраўніка Пентагона Роберт Уорк патлумачыў WSJ неабходнасць размяшчэння амерыканскіх узброеных сіл тым, што многія краіны Усходняй Еўропы выказваюць занепакоенасць расійскай агрэсіяй, а таксама сумняюцца ў гатоўнасці ЗША абараняць рэгіён. Новая мера Пентагона павінна развеяць гэты страх, адзначыў Уорк.
Пастаянны прадстаўнік Расеі пры НАТА Аляксандр Грушко ў эфіры тэлеканала «Расія 24» у сераду заявіў, што Расія рыхтуе асіметрычны адказ на ўзмацненне прысутнасці НАТА і ў прыватнасці ЗША ля расійскіх межаў.
«Вядома, адказ будзе зусім асіметрычны, ён будзе адкалібраваны так, каб ён адпавядаў нашым уяўленням аб ступені ваеннай пагрозы, быў максімальна эфектыўным і не быў надзвычай затратным», - сказаў ён.
