Здаць практычны экзамен на права кіравання матацыклам можна будзе каля Лядовага Палаца спорту Мінскай вобласці 16 красавіка. У гэты дзень на адкрыцці мотасезона пройдзе акцыя, накіраваная на прафілактыку дарожна-транспартнага траўматызму з удзелам двухколавага транспарту, паведамілі ў АДАІ Фрунзенскага раёна сталіцы.
На адкрыцці мотасезона Дзяржаўтаінспекцыя дасць магчымасць кіроўцам, якія маюць катэгорыю «В» і хочуць адкрыць «А1», здаць практычны экзамен проста падчас мерапрыемства. Праверка навыкаў кіравання матацыклам будзе ажыццяўляцца на пляцоўцы перад Лядовым Палацам спорту. Вынікі практычнага экзамену занясуць у экзаменацыйную картку па кіраванні матацыклам.
Кіроўцы, у якіх маецца катэгорыя «В» і вышэй, могуць атрымаць катэгорыю «А1», здаўшы толькі практычны экзамен, а потым, праз два гады, адкрыць катэгорыю «А» (аўтаматычна). Існуе магчымасць атрымаць катэгорыю «А» адразу — для гэтага неабходна прайсці навучанне ў моташколе і затым здаць практычны экзамен у ДАІ. Здаць практычныя экзамены на права кіравання матацыклам можна кожную сераду з 15.00, а таксама кожную суботу з 11.00 і з 15.00. Больш падрабязную інфармацыю, у тым ліку аб кошце паслуг, можна даведацца на сайце gaiminsk.by.
