19.04.2016 / 18:30

За спакушэнне дзяцей у сацсетках і захоўванне дзіцячай парнаграфіі плануецца ўвесці крымінальную адказнасць 3

На гэтай сесіі Палаты прадстаўнікоў Нацыянальнага сходу Беларусі плануецца заканадаўча замацаваць крымінальную адказнасць за «схіленне дзяцей да сексуальнай сувязі з дапамогай зносін у інтэрнэце», а таксама за захоўванне дзіцячай парнаграфіі.

Пра гэта паведаміў намеснік старшыні пастаяннай камісіі па ахове здароўя, фізічнай культуры, сямейнай і маладзёжнай палітыцы Вадзім Дзевятоўскі 19 красавіка на пленарным пасяджэнні 6-й міжнароднай канферэнцыі «Бяспечная Беларусь для дзяцей: у свеце без межаў», якая праходзіць у Мінску 18—22 красавіка.

«Ёсць дзеці, якія сутыкнуліся з гвалтам, і гэта лёсы зламаныя, магчыма, на ўсё жыццё, — сказаў ён. — Тут наша задача, па-першае, прафілактыка гвалту, па-другое, мінімізацыя наступстваў, каб дзіця выйшла з вельмі складанай стрэсавай сітуацыі, пераадолеўшы яе».

«За тое, каб гэтыя людзі траплялі пад крымінальную адказнасць, у нас прайшло некалькі абмеркаванняў і ўзгадненняў з удзелам спецыялістаў, і сёння мы на фінішнай прамой, — сказаў Дзевятоўскі. — Усе зацікаўленыя бакі выказаліся, прыйшлі да ўзаемаразумення. Вельмі спадзяюся, што на вясенне-летняй сесіі меры, якія мы прапануем, будуць прынятыя».

Пры гэтым Дзевятоўскі падкрэсліў, што «толькі ўзмацненнем крымінальнай адказнасці гэтай праблемы не вырашыць, бо могуць пацярпець невінаватыя». Паводле яго слоў, у вырашэнні гэтай праблемы Беларусь «пойдзе сваім шляхам, абапіраючыся на замежны вопыт».

«Пачаць трэба з адміністрацыйнай адказнасці, таму многія выказваліся, што адразу крымінальнае пакаранне — занадта жорсткі крок для таго, хто спатыкнуўся, не туды залез у інтэрнэце, выпадкова запампаваў файл, або яго падкінулі, і гэтак далей», — лічыць парламентарый.

«Тут мы будзем выкарыстоўваць вопыт замежных спецыялістаў, якія ў сябе мінімізуюць наступствы для сапраўды невінаватых, якія трапілі выпадкова, — растлумачыў парламентарый. — Для гэтага за мяжой ёсць праграмы, распрацаваныя механізмы для выяўлення злога намеру».

6-я міжнародная канферэнцыя «Бяспечная Беларусь для дзяцей: у свеце без межаў», якая праходзіць у Мінску, сабрала больш за 250 чалавек. Удзельнічаюць у форуме прадстаўнікі органаў заканадаўчай і выканаўчай улады, дзяржкіравання, грамадскіх арганізацый, ВНУ, міжнародныя эксперты, прадстаўнікі міжурадавых арганізацый, а таксама дзеці і іх законныя прадстаўнікі.

0
Мікола / Адказаць
19.04.2016 / 18:38
Дзеці да 16 ці да 18?
0
Satan / Адказаць
19.04.2016 / 19:07
Молодцы! Но также обязательно необходимо ввести крымінальную адказнасць за спакушэнне дзецьми. От 15 до 70 лет. Пишет ребенок, например, премьер-министру и предлагает секс. А премьера хлоп и на 50 лет в тюрягу!
0
Сілівон / Адказаць
19.04.2016 / 20:51
Слушна робяць. Калі скажуць, што ў апазіцыянера знайшлі парнаграфію, ніхто не пачухаецца. А вось калі скажуць, што знайшлі дзіцячую, то гнеў народу на вычварэнца гарантаваны.
Каб пакінуць каментар, калі ласка, актывуйце JavaScript у наладах свайго браўзеру