Род Дэніэл меў моцную прагу да жыцця і праходзіў спецыяльную праграму лячэння хваробы Паркінсона. Фота сайта Northwestern Medicine.
У ЗША ва ўзросце 73 гадоў памёр рэжысёр Род Дэніэл, які зняў такія фільмы, як «Бетховен-2», «К-9: Сабачая праца» і «Адзін дома — 4», паведамляе The Hollywood Reporter са спасылкай на яго сваякоў.
Дэніэл пачынаў сваю кар'еру на тэлебачанні, дзе быў прадзюсарам і рэжысёрам сіткама «Радыё Цынцынаці».Першым поўнаметражным фільмам Дэніэла стаў фільм «Ваўчаня». Галоўную ролю ў карціне сыграў Майкл Джэй Фокс.
Ён таксама зняў вялікую колькасць іншых фільмаў і эпізодаў у серыялах. У прыватнасці, «Які бацька, такі і сын», «Наглядчык», «Ньюхарт», «Усе любяць Рэймонда».
Апошняй працай рэжысёра стаў фільм «Адзін дома — 4», які выйшаў у 2002 годзе. Дэніэл сышоў з кіно ў 2003 годзе.
Моцным захапленнем Дэніэла была фатаграфія. Ён зрабіў выдатныя мастацкія фатаграфіі, у асноўным гэта былі чорна-белыя сцэны сельскага жыцця ў Амерыцы.
Дэніэл памёр у суботу, 16 красавіка, ва ўласным доме ў Чыкага (штат Ілінойс).
