Нарвежскі суд задаволіў пазоў Андэрса Брэйвіка, які адбывае турэмны тэрмін за забойства 77 чалавек. Ён скардзіўся на негуманныя ўмовы ўтрымання ў нарвежскай турме.
«Суд […] прыйшоў да высновы, што ўмовы ўтрымання ў турме ўяўляюць сабой негуманнае абыходжанне», — цытуе суддзю акруговага суда Осла агенцтва Франс прэс.
«Забарона на негуманнае абыходжанне з чалавекам уяўляе сабой адну з асноватворных каштоўнасцяў дэмакратычнага грамадства. Гэта дзейнічае нягледзячы ні на што — нават калі гаворка ідзе пра забойцаў і тэрарыстаў», — сказала суддзя.
Слуханні па пазове Брэйвіка з нагоды негуманнага абыходжання з ім у турме пачаліся ў сакавіку.
Брэйвік сцвярджаў, што за час знаходжання ў зняволенні яго абшуквалі больш за 800 раз, што парушала яго правы як зняволенага. Часта гэтыя ператрусы праходзілі сярод ночы. Таксама ён правёў каля пяці гадоў у адзіночнай камеры.
Суд пагадзіўся з гэтымі довадамі, аднак не прызнаў, што было парушана права Брэйвіка на прыватнае жыццё і перапіску.
У сваім пазове Брэйвік скардзіўся, што ахоўнікі правяраюць усе лісты, што прыходзяць да яго, і што ў яго няма права на публікацыю кніг.
Суд пастанавіў, што ўрад павінен кампенсаваць усе выдаткі Брэйвіка на адвакатаў — 330 000 крон (каля 40 тысяч даляраў).
