Расійскія сілавікі правялі ў Смаленскай вобласці вучэнні па разгоне несанкцыянаванага мітынгу жыхароў, якія пратэставалі супраць павышэння аплаты камунальных паслуг.
Паводле легенды, мясцовыя жыхары атрымалі завышаныя плацёжкі за паслугі ЖКГ і выйшлі на несанкцыянаваны пратэстны мітынг, які перарос у масавыя беспарадкі. Па сцэнары чыноўнікі адміністрацыі раёна сумесна з участковым спрабавалі растлумачыць жыхарам сітуацыю і заклікаць іх да парадку, аднак ніякія довады не маглі ўціхамірыць натоўп. У выніку жыхары пачалі закідваць прадстаўнікоў улады бутэлькамі і дымавымі шашкамі. І тады спецпадраздзяленні раскінулі па перыметры пляцоўкі калючы дрот, разбілі натоўп на дзве часткі і ўзялі актывістаў у кола.
Меркаваныя завадатары беспарадкаў пры гэтым былі дастаўлены ў аддзяленне паліцыі для далейшага разгляду.