26.04.2016 / 15:25

Лукашэнка: Шкода Беларусі ад Чарнобыльскай катастрофы склала 235 млрд даляраў 9

Беларусь зрабіла правільна, пайшоўшы па шляху рэабілітацыі тэрыторый, пацярпелых ад катастрофы на Чарнобыльскай АЭС. Пра гэта Аляксандр Лукашэнка заявіў, адказваючы на пытанні журналістаў 26 красавіка ў Ельскім раёне (Гомельская вобласць).

president.gov.by

«Ліквідаваць наступствы катастрофы мы былі вымушаныя адначасова з рашэннем задач па аднаўленні кіраванасці краіны, выратаванні заводаў і фабрык, сельскагаспадарчых прадпрыемстваў, сацыяльнай абароне людзей. Шматлікія эксперты з важным выглядам знаўцаў паўтаралі, што наваяўленая рэспубліка не вытрымае такога вялізнага цяжару. Нам прадракалі хаос і выраджэнне, — сказаў Аляксандр Лукашэнка. — Аднак перад тварам агульнанацыянальнага бедства беларускі народ, як гэта не раз бывала ў гісторыі, праявіў праўдзівы гераізм. Ён не апусціў рукі, знайшоў у сабе сілы згуртавацца, і таму выстаяў».

Кіраўнік дзяржавы адзначыў, што шкода, нанесеная эканоміцы краіны чарнобыльскай катастрофай, ацэньваецца прыкладна ў 235 млрд даляраў.

Да сённяшняга дня выдаткі Беларусі на пераадоленне наступстваў аварыі перавысілі 22 млрд даляраў. Пры гэтым, падкрэсліў Лукашэнка, у гэтую суму ўвайшлі не ўсе падлікі, затрачаныя чалавечыя рэсурсы, таму канчатковая лічба можа перавысіць 30 млрд даляраў.

Ён таксама ўказаў, што Беларусь спраўляецца з наступствамі чарнобыльскай трагедыі практычна ўласнымі сіламі.

«Дапамога міжнароднай супольнасці была і застаецца вельмі нязначнай — каля 1-2% ад нашых унутраных выдаткаў, — сказаў Аляксандр Лукашэнка.

— Вядома, крыўдна, што Захад многія гады ціснуў нас санкцыямі, фінансаваў нашу апазіцыю замест таго, каб аказаць нам важкую падтрымку.

Гэта было б у духу тых самых агульначалавечых каштоўнасцяў і гуманізму, якія ён так дбайна адстойвае. Тым больш што беларусы сталі закладнікамі катастрофы, якая здарылася не па іх віне».

З-за радыеактыўнага забруджвання прыйшлося агарадзіць шырокія зоны, куды ўваход забаронены. Каля 140 тыс. чалавек былі пераселены ў іншыя месцы. З абароту выведзена 264 тыс. га сельскагаспадарчых угоддзяў, пацярпела звыш чвэрці ляснога фонду Беларусі.

«Дзякуй Богу, у нас хапіла мудрасці і вытрымкі, каб не паддацца паніцы. Інакш цяпер велізарная частка тэрыторыі краіны ўяўляла жахлівы выгляд запусцення і вымірання», — сказаў на заканчэнне беларускі кіраўнік.

Ён распавёў, што калі стаў прэзідэнтам Беларусі, перад ім стаяў сур'ёзны выбар, што рабіць у адносінах пацярпелых тэрыторый. «Людзі былі напалоханыя. Але я ўсім сэрцам і душой разумеў, што гэта — наша зямля і яе трэба адраджаць, - сказаў кіраўнік дзяржавы. — Вынік сёння відавочны. Можна адкрыта і прама сказаць: мы зрабілі правільна, пачаўшы рэабілітацыю гэтых земляў».

Ён падкрэсліў, што галоўны ўдар ад аварыі на ЧАЭС прыняла на сябе менавіта Беларусь. За мінулыя гады ў рэабілітацыю пацярпелых тэрыторый былі ўкладзеныя дзясяткі мільярдаў даляраў, і затрачаныя намаганні былі не марныя. Вынік бачны на прыкладзе Ельскага раёна, які наведаў Лукашэнка.

«Сёння ў Ельскім раёне амаль не засталося зямель, якія трэба вяртаць да жыцця. Ужо няўдобіцы распрацоўваюць, — адзначыў кіраўнік дзяржавы. — Вазьміце Добрынь [аграгарадок, дзе пабываў Аляксандр Лукашэнка]: 50 чалавек у дзіцячым садзе, яшчэ столькі ж гатовыя хутка туды прыйсці. Значыць, ёсць перспектыва, ёсць жыццё».

«Гэта значыць, мы зрабілі нямала і прынялі правільнае рашэнне, — падкрэсліў Аляксандр Лукашэнка. — За пяцігодку, якая пачалася, пры ўсіх праблемах і цяжкасцях, мы канчаткова вырашым усе пытанні, якія звязаны з поўднем нашай краіны, каб гэтыя землі забыліся трагедыю».

Кажучы пра дасягненні ў рэабілітацыі чарнобыльскіх тэрыторый, Аляксандр Лукашэнка адзначыў, што гэтую працу варта было пачаць значна раней, яшчэ ў часы існавання СССР.

«Але тады быў страчаны час. Прыкладна 10-15 гадоў патрацілі ў развагах і спрэчках. Калі б можна было вярнуць час назад, трэба было б пачынаць гэта раней. Але і так зроблена нямала, сваімі рукамі», — сказаў кіраўнік краіны.

0
Землю народу! / Адказаць
26.04.2016 / 15:49
Нужно подавать иск на основании этой информации - http://www.telegraph.co.uk/news/worldnews/1549366/How-we-made-the-Chernobyl-rain.html
0
Гэць!!!!!! / Адказаць
26.04.2016 / 16:16
Ну i накуй тыя станцыi пры такой шкодзе 235 млрд.$ +10 млрд.$ сама станцыя +вываз(завоз новага) i захаванне адпрацаванага палiва .
0
Менск / Адказаць
26.04.2016 / 16:22
Птрэбны мiжнародны суд над рсфср i яе прыслужнiкамi у Беларусi
Паказаць усе каментары/ 9 /
Каб пакінуць каментар, калі ласка, актывуйце JavaScript у наладах свайго браўзеру