НАТА павінна рэагаваць на дзеянні Расіі з дапамогай сілы і пераканаўчых стрымліваючых фактараў.
Пра гэта заявіў генеральны сакратар НАТА Енс Столтэнберг у інтэрв'ю нямецкаму выданню Die Welt і альянсу еўрапейскіх газет LENA (Leading European Newspaper Alliance), піша Нямецкая хваля.
«Масква незаконна анексавала Крым, падтрымлівае сепаратыстаў на ўсходзе Украіны і парушае міжнароднае права. Менавіта таму мы пашырым сваю прысутнасць на ўсходніх межах альянсу», — адзначыў Столтэнберг.
Паводле яго слоў, цяпер абмяркоўваецца варыянт, згодна з якім у кожнай з краін Балтыі і ў Польшчу будзе накіраваны міжнародны батальён, гэтыя сілы будуць знаходзіцца ў рэжыме ратацыі. Канчатковае рашэнне будзе прынята да пачатку саміту краін-сяброў НАТА ў Варшаве ў ліпені 2016 года.
«Па вызначэнні Масквы, «істотныя баявыя сілы» — гэта пастаяннае знаходжанне не менш за 1000 салдат у адной дзяржаве, якая ўваходзіць у НАТА. Да гэтага паказчыка нам далёка», — заявіў генеральны сакратар.
Таксама ён адзначыў, што нішто не паказвае на тое, што РФ у найбліжэйшай будучыні нападзе на любую з краін, якія ўваходзяць у альянс.
«Аднак мы павінны быць падрыхтаваныя, павінны забяспечыць дзяржавам-сябрам НАТА поўную салідарнасць і адначасова праводзіць палітыку стрымлівання», — сказаў Столтэнберг і назваў гэтыя меры «абгрунтаванымі, абароннымі і адпаведнымі міжнароднаму праву».
Ён падкрэсліў, што НАТА не шукае канфрантацыі з Расіяй і не імкнецца да халоднай вайны. Таксама ён адзначыў, што ўсе мерапрыемствы з'яўляюцца рэакцыяй на анексію Крыма і дэстабілізацыю на ўсходзе Украіны.
Таксама Генеральны сакратар НАТА адзначыў, што каналы для палітычнага дыялогу павінны быць адкрытыя, каб працягваць шукаць спосабы зніжэння напружанасці і рызыкі ваенных інцыдэнтаў. Пры гэтым ён не выключыў, што да саміту ў Варшаве адбудзецца яшчэ адна сустрэча ў рамках Рады Расія-НАТА.
