Камітэт дзяржаўнай бяспекі працягвае расследаванне крымінальнай справы ў дачыненні бізнэсмена Юрыя Чыжа і ягонай кампаніі «Трайпл».

Як стала вядома «Нашай Ніве», у яго рамках былі арыштаваныя актывы «Трайпла». Пастанова аб накладанні арышту была вынесена 28 сакавіка 2016 года.

Адзін з актываў — знакаміты «Дом Чыжа» каля Траецкага прадмесця. У ім заставаліся нераспрададзеныя 27 кватэр — ад аднапакаёвак плошчай 55м2 да вялікіх апартаментаў плошчай каля 300 м2.

Фота Сяргея Гудзіліна.

Гэтыя кватэры былі ў закладзе беларускіх банкаў. Нерухомасць дазваляла Чыжу атрымліваць крэдыты. Выглядае, што аддаваць іх своечасова ён не мог.

Фота Сяргея Гудзіліна.

Напрыклад, у верасні 2013 года «Трайпл» адкрыў у «Белінвестбанку» крэдытную лінію на $10 мільёнаў. Грошы мусілі быць вернутыя да 31 снежня 2015 года. Аднак за дзень да сканчэння тэрміну Чыжу ўдалося перападпісаць дамову — ён абавязаўся сплаціць $10,2 мільёна, але ў пачатку 2017 года.

Банк ВТБ выдаў Чыжу пад заклад нерухомасці 7,6 мільёна еўра, а іншай дамовай — яшчэ $3 мільёны.

Амаль усе арыштаваныя кватэры не мелі гаспадароў, і па паперах яшчэ належалі «Трайплу». Адзінае выключэнне — трэнер фрыстайлістаў Мікалай Казека і яго жыллё.

Мікалай Казека справа.

Мікалай Казека — гэта той самы трэнер, вучні якога заваявалі на зімовых Алімпіядах шэсць медалёў, у тым ліку тры залатыя. Некаторыя з іх, Ала Цупер і Антон Кушнір, атрымалі кватэры ў доме «Ля Траецкага» ў падарунак ад Юрыя Чыжа. А для іх трэнера было вырашана зрабіць зніжку.

Доўгі час жыллё ў «Доме Чыжа» прадавалася па $3000 за квадратны метр. Праз крызіс цэны на нерухомасць абваліліся, і «Трайпл» знізіў цану на рэшту непрададзеных кватэр да $2000.

Але для Мікалая Казекі летась было зроблена выключэнне. Чыж пагадзіўся прадаць яму кватэру плошчай 105 квадратных метраў у растэрміноўку ўсяго па $1000 за метр. Трэнер мусіў канчаткова выплаціць грошы да сярэдзіны 2018 года. Да таго часу праваўласнікам заставаўся «Трайпл». Калі КДБ заняўся маёмасцю «Трайпла», пад арышт трапіла і кватэра Казекі.

Хочаш падзяліцца важнай інфармацыяй ананімна і канфідэнцыйна?

0
Мордехай В. / Адказаць
02.05.2016 / 13:47
Я канешне, жадаю Чыжу напаткаць справядлівасць у плечы, а дом гэты наогул трэба знесці... Але не здзіўлюся, калі кватэры праз паўгады апануюць людзі ў пагонах, а штатныя тролі будуць казаць: "а што нормальный дом, пусть стоит. мне не мешает"
0
Азумгарумге / Адказаць
02.05.2016 / 13:48
А Доймрачавай? А прычым тут КДБ? Зараз раздадуць "нуждающимся у корыта"
0
кгб-фсб / Адказаць
02.05.2016 / 13:50
Какой нормальный человек инвестирует хоть один доллар в РБ?
Паказаць усе каментары/ 18 /
Каб пакінуць каментар, калі ласка, актывуйце JavaScript у наладах свайго браўзеру